Գյուղապետերը թերացել են հարկեր հավաքագրել
Իսկ մարզպետը զգուշացնում է, որ «անվստահություն» կհայտնի
Այս տարվա առաջին կիսամյակում Արագածոտնի մարզի որոշ համայնքներ թերացել են հավաքել եկամուտները: Հուլիսի 8-ի մարզխորհրդի նիստի ժամանակ մարզպետ Սարգիս Սահակյանը «սպառնաց» համայնքապետերին, որ թերացող գյուղապետերի հետ ցանկություն չունի աշխատել եւ ծայրահեղ դեպքում օրենքը հնարավորություն է տալիս նրանց անվստահություն հայտնել: Մինչ այդ լուռ նստած գյուղապետերը սկսեցին իրար հետ զրուցել, քննարկել մարզպետի ասածը, բայց ոչ ոք չհամարձակվեց բարձրաձայն արտահայտել իր կարծիքը:
«ՏՒՄ»-ի մասին օրենքով, համայնքապետերն ունեն որոշակի անկախություն, քանի որ նրանք ընտրվել են ժողովրդի քվեով, բայց մարզխորհրդի նիստերին նրանք խեղճացած հայացքով են նայում ու նիստի ավարտից անմիջապես հետո արագ անհետանում տեսադաշտից: Շատ գյուղապետեր էլ «թուք ու մուր» ուտելուց խուսափելու համար նախընտրում են ընդհանրապես չգալ մարզխորհրդի նիստերին:
Օրինակ, ըստ մարզպետարանից տրամադրած տեղեկատվության, Բյուրական համայնքը 2010 թ.-ի համար նախատեսել է 6 մլն 228 հազար դրամի գույքահարկ, 6 ամսվա ընթացքում համայնքապետը պետք է հավաքագրեր 3 մլն 114 հազար դրամ, սակայն փաստացի հավաքագրել է 147 հազար դրամ` 4.7 տոկոս: Հողի վարձավճարների գանձման առումով էլ գյուղապետը առաջընթաց չի գրանցել` ընդամենը 35 տոկոս: Մարզպետը փորձեց տեղում հետաքրքրվել, թե ինչու է թերացել գյուղապետ Հրաչյա Ավագյանը, սակայն նա նիստին ներկա չէր:
Գույքահարկը 2.8 տոկոսով է կատարել Կարբիի գյուղապետը, իսկ հողի հարկը գանձել է 26.9 տոկոսով: Գույքահարկի 0 տոկոս ցուցանիշ են արձանագրել Լեռնարոտ, Ղազարավան, Դպրեւանք, Նոր Եդեսիա, Տեղեր, Արագածավան, Արեգ, Օթեւան, Դաշտադեմ, Դավթաշեն եւ եւս 6 համայնքներ: Հողի հարկի հավաքագրման ուղղությամբ 0 տոկոս ցուցանիշ չի արձանագրվել, սակայն շատ համայնքներ նույնիսկ նախատեսածի կեսը չեն կարողացել գանձել. Կոշը` 18.7 տոկոս, Կանիաշիրը (Սանգյառ)` 9.9 տոկոս, Օթեւանը` 10 տոկոս, Հացաշենը 13 տոկոս եւ այլն:
«Որ ձեր պարտավորությունները չեք կատարում, ինչպե՞ս եք ձեր աշխատակազմի աշխատողների աշխատավարձերը վճարելու»,-համայնքապետերին ամբիոնից հարց ուղղեց մարզպետ Ս. Սահակյանը: Գյուղապետերի կողմից այդպես էլ պատասխան չհնչեց:
Օթեւանի գյուղապետ Բրո Ֆատոյանից հետաքրքրվեցինք, թե ի՞նչն է իր պարտավորությունների թերացման պատճառը, որ քիչ է հարկեր հավաքագրել: Գյուղապետը պատասխանեց, որ մինչեւ ամսվա վերջ կհավաքի հարկերը:
«Դուք էլ, որ գյուղում աշխատեիք կտեսնեիք, թե ինչքան դժվար է աշխատելը: Մարդկանց ձեռքին գումար չկա, ինչպես նրանց ստիպեմ, որ հարկ վճարեն, եթե դուք ձեւը գիտեք, ասեք, այդպես էլ կանեմ: Դեռ ժամանակ ունենք, մարդիկ բերք կվաճառեն հարկերը կփակեն»,- «Հետքի» հետ զրույցում ասաց գյուղապետը:
Կոշի գյուղապետն էլ նշեց, որ իրեն անվստահություն հայտնելու վտանգը չի սպառնում, թեեւ թերացել է հարկերը հավաքագրել: «Միայն տեղական հարկեր հավաքագրելով չի որոշվում համայնքապետը լավ է աշխատել, թե վատ, շատ հարցերում ես գերազանց եմ»,-ասաց Աշոտ Ենգիբարյանը: Նա նշեց, որ տարվա սկզբից Կոշը մի քանի անգամ տուժել է բնական աղետներից. նախ` գարնանը, երբ ծառերը ծաղկել էին` ձյուն եկավ, հետո էլ 3 անգամ ուժեղ կարկուտ է տեղացել:
«Գյուղում այնքան ուժեղ կարկուտ եկավ, որ 24 ժամ գետնի վրա կարկուտի հատիկները մնացել էին: Գյուղացիների ձեռքին հիմա գումար չկա, նոր-նոր սկսել են բերք վաճառել, եկող ամսվանից արդեն ակտիվ վճարումները կանեն»,-ավելացրեց Ա. Ենգիբարյանը:
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
Մեկնաբանել