Վանաձորի քաղաքապետ Սամվել Դարբինյանի կարծիքով` «հողի տերը համայնքն է. տնակը հենց վրին էլ կարա վաճառի»: Այս ձեւով էլ Վանաձորի քաղաքապետարանը 202.800 դրամով մասնավորեցրել է Վանաձորի Մանուշյան 28 հասցեի 60 քմ մակերեսով հողատարածքը: Հողն օտարելիս հողի վրա փաստացի տնակ է եղել, իսկ տնակում` փաստացի ապրողներ:

Մինչդեռ, հողի օտարման կարգը ներկայացնելով, Վանաձորի քաղաքապետարանի ճարտարապետության եւ քաղաքաշինության բաժնի պետ Տիգրան Պապանյանն ասում է. «Եթե հողի վրա կա որեւէ շինություն, թեկուզ ժամանակավոր, հողը օտարել արգելվում է: Տնակի տակի հողը վաճառվում է միայն տնակը հանելուց հետո»:

Ազգությամբ հույն, 72-ամյա Էլեմբիտա Տրանդաֆիլովան որդու` Անաստաս Տրանդաֆիլովի հետ երկրաշարժից հետո բնակություն է հաստատել նշված հասցեի տնակում: Տնակը ժամանակավոր բնակության համար նրան է հատկացվել նախկին «Ավտոգենմաշ» արտադրական միավորման կողմից որպես արտադրամասի աշխատակցի:

Երկրաշարժից հետո նշված տարածքում նմանօրինակ տնակներ եւ կառույցներ տեղադրված են եղել 60-ից ավելի: Այժմ այդտեղ փաստացի բնակվող ընտանիքների թիվը 8-ն է: Նրանք «Ավտոգենմաշ» գործարանի նախկին եւ ներկայիս աշխատողներն են:

2005-ին Էլեմբիտա Տրանդաֆիլովան մեկնել է ՌԴ` այնտեղ տեղափոխված որդու մոտ` տնակը թողնելով եղբոր աղջկան ու տղային: Իսկ 2008-ին վերադառնալով` իմացել է, որ տնակի տարածը վաճառված է:

Տրանդաֆիլովայի ասելով` եթե իմանար, որ տարածքը վաճառվում է, ինքը կգներ: Քաղաքապետ Դարբինյանը վստահեցնում է, որ նման դեպքում բնակիչը նախազգուշացվում է. «Նույնիսկ տնակի վրա կպցնում ենք, որ էս ժամանակում պետք է հանվի, չհանելու դեպքում` աճուրդային վաճառք»,- ասում է քաղաքապետը: Բայց Տրանդաֆիլովայի բացակայությամբ նրա տնակում ապրած բարեկամներն էլ, հարեւաններն էլ հաստատում են, որ քաղաքապետարանից ոչ մի անգամ չեն նախազգուշացրել, ոչ մի թուղթ չեն փակցրել: Հարեւաններն այդ մասին խոսակցություններից են իմացել. «Որ էս տարածքները գալիս էին չափում, ասում էին` Էլեմբիտայի տարածքն էլ են ծախել: Կողքից լսում էինք, որ ծախել են: Բայց կոնկրետ ինչ-որ մեկին բան չեն ասել»,- ասում է հարեւանուհին` Ամալյա Թազայանը:

Տրանդաֆիլովան դիմել էր քաղաքապետարան` իմանալու` իրո՞ք վաճառված է իր տնակի տարածքը: Նրա դիմումին չէին պատասխանել: Նա էլ դիմումն ուղարկել էր վերադաս ատյաններին:

Ի դեպ, Տրանդաֆիլովայի դիմումներն անպատասխան թողնելու համար Վանաձորի քաղաքապետարանի ճատարապետության եւ քաղաքաշինության բաժնի պետ գլխավոր ճարտարապետ Տ. Պապանյանը եւ նույն բաժնի առաջատար մասնագետ Ն. Օհանյանը ենթարկվել են կարգապահական տույժի:

Վերջապես Տրանդաֆիլովային ուղարկվել էր պատասխան, որ նրա տնակի տարածքը վաճառված է: «Դրանից հետո գալիս ահաբեկում էին քաղաքապետարանի աշխատողները, թե տարածքը պետք ա ազատես: Դուրս արի, եթե չէ, զոռի կհանենք: Ոտս դեմ տվի, ասի` դուս չտեմ գալ»,- պատմում է Տրանդաֆիլովան:

Նրա ասելով` գնորդն էլ է եկել այդ տարածք, բայց իրեն երբեք չի անհանգստացրել: Տրանդաֆիլովայի ասելով` լսել է, թե ինչպես է գնորդն ասել. «Հույնի տարածքը առել եմ ու քաշվել: Որ գիտենայի սենց պետք ա լինի, չէի վեր ունի»:

Տարածքը վաճառելու վերաբերյալ քաղաքապետարանից այն պատճառաբանությունն են բերում, թե Վանաձորում իրականացվում է քաղաքի վարչական տարածքը ոչ հիմնական շինություններից ազատելու գործընթաց: Իսկ նշված` տնակը վրան հողատարածքը վաճառվել է, որովհետեւ, ըստ թաղամասն սպասարկող հիմնարկի տեղեկանքի, Տրանդաֆիլովան եւ նրա որդին բացակայել են հանրապետությունից:

Համատիրության կողմից շինությունը` որպես չբնակեցված, հաշվառվում է տնայցերի արդյունքում: Սակայն Տրանդաֆիլովայի բացակայության տարիներին նրա տնակը բնակեցված է եղել: Այդ տարիներին (2006, 2007, 2008 թթ.) նշված հասցեից Տրանդաֆիլովայի անվամբ էլեկտրաէներգիայի վարձավճար է մուծվել:

Տրանդաֆիլովային առաջարկվել է քաղաքապետարանի միջոցներով վաճառված տարածքից տնակը տեղափոխել տնակային ավան: «Դոմիկդ հանի, որ չափենք-ձեւենք, տանք քեզ»,- ասել են Տրանդաֆիլովային: «Խի՞ դոմիկս հանեմ, որ ինձ ըստիան քշե՞ն: Հլա թուղթ էլ էին բերել, թե ստորագրի, ասել եմ` չեմ ստորագրում: Խի ես 20 տարի ըստեղ ապրեմ, հըմի ուրիշին տա՞ն: Իմս էր, առաջին հերթին տարածքը ինձ էր հասնում չնչին գումարով: Եթե ես հրաժարվեի, նոր թող աճուրդի դնեին էն պայմանով, որ դոմիկը հանվեր, ազատվեր, նոր դնեին աճուրդի: Դոմիկը դրած, ըրեխեքը ըստեղ` ծախել են»,- իր իրավունքների մասին է խոսում Տրանդաֆիլովան:

Գիտի, որ օրենքով հողամասը կարող է մասնավորեցվել այդ հողի վրա բնակվողին, որն էլ կարող է օգտվել հայտարարված գնով հողը գնելու նախապատվության իր իրավունքից: