Պաշտոնյաները խոստանում են, որ «Հայկական միրգը» եվրոպական չափանիշների միրգ կարտահանի Եվրոպա Այսօր «Գյուղական կարողությունների ստեղծման ծրագիր» թեմայով քննարկմանը մասնակից մոտ 60 պաշտոնյաները հարց ու պատասխանի միջոցով պետք է հանրությանը լսելի դարձնեն, թե ինչ է «Գյուղական կարողությունների ստեղծման ծրագիը»: Ըստ ծրագրի պատասխանատուների` իրենց նպատակն է նպաստել գյուղական աղքատության նվազեցմանը` ժամանակակից այգեգործության ներդրման ճանապարհով աղքատների ունեցվածքի և եկամուտների ավելացման միջոցով: Ծրագրի կարևորագույն խնդիրներից է նաև արտադրանքի որակի, քանակի և մրցունակության ապահովումը հատկապես ԱՊՀ և եվրոպական շուկաներում: Հայաստանի հողն ու ջուրը աղտոտված է, ինչին նպաստում է նաև Մեծամորի ԱԷԿ-ը: Ուստի, գյուղատնտեսության փոխնախարար Սամվել Գալստյանից հետաքրքրվեցինք, թե արդյոք մեր արտադրանքը կարո՞ղ է մրցունակ լինել եվրոպական շուկայում, որի պահանջներն ավելի խիստ են: «Այդ ուղղությամբ կառավարությունն արդեն որոշակի քայլեր կատարել է: Արդեն ունենք «Օրգանիկ գյուղատնտեսության մասին» օրենք և մի շարք ենթաօրենսդրական ակտեր: Օրգանիկ գյուղատնտեսությամբ զբաղվողներին տրվում է հատուկ հավաստագրեր, որ կարողանան արտահանել: Ատոմակայանի շրջակայքում, որոշ չափորոշիչներով, իրոք չի կարելի այգիներ հիմնել` հատկապես հատապտուղներ, թթենի: Այդ տարածքից դուրս կարող ենք լիակատար բերք ստանալ: Դա վտանգավոր չէ»,- «Հետքի» հետ զրույցում ասում է Ս. Գալստյանը: Թեև օրգանիկ գյուղատնտեսությունից պակաս բերք է ակնկալվում, քան ավանդական գյուղատնտեսությունից, սակայն եկամուտները 3 անգամ ավելի են: «Գյուղական կարողությունների ստեղծման ծրագրով» նախատեսվում է հիմնադրել «Հայկական միրգ» ԲԲԸ: Ընկերությունը պայմանագրեր կկնքի Արագածոտնի մարզի Թալինի տարածաշրջանի, Տավուշի և Վայոց ձորի մարզերի մանր արտադրությամբ զբաղվող գյուղացիների հետ: Գյուղացիների հողերը պետք է լինեն 1-3 հա-ի չափով: Նրանց հետ կնքված պայմանագրերով հողերը 12 տարի ժամկետով տրամադրվելու են «Հայկական միրգ» ԲԲԸ-ին: Վերջինս այդ տարածքներում հիմնելու է նոր այգիներ: Առաջին 5 տարվա համար գյուղացիները որևէ հատուցում չեն ստանալու, իսկ երբ այգիները բերք տան, սկզբում եկամուտի 20, ապա 25, իսկ հաջորդ տարի 30 տոկոսը տրամադրվելու է հողի սեփականատեր գյուղացիներին, իսկ 12-րդ տարում այգիները վերջնականապես պատկանելու են գյուղացիներին: Ծրագրի գյուղատնտես, գյուղնախարարության բուսաբուծության վարչության նախկին պետ Գառնիկ Պետրոսյանը «Հետքին» ասաց, որ «Հայկական միրգ» ԲԲԸ-ի բաժնեմասերի 100 տոկոսը պետությանն է պատկանելու, սակայն հողերի սեփականատեր գյուղացիներն էլ կարող են մասնակցել այգիների հիմնմանը` որպես բանվոր պայմանագրով աշխատելով նորատունկ այգիներում: Ծրագրով նախատեսվում է ներկայիս «բարձրահասակ» ծառերը փոխարինել ցածրերով, որպեսզի հնարավոր լինի և բուժել դրանք, և բերքն ավելի հեշտ հավաքել: Բացի դրանից` «ցածրահասակ» ծառերը հնարավորություն են տալիս ներկայումս աշխարհում լայն կիրառում ունեցող հատուկ ցանցերի միջոցով ծածկել այգիները, ինչը 100 տոկոսով պաշտպանում է կարկուտից: Առաջարկվում է նաև այգիները ոռոգել կաթիլային եղանակով, ինչն ավելի մատչելի է և արդյունավետ: Ոռոգումն իրականացվելու է ավտոմատ եղանակով, և ծառերը ջրվելու են կաթիլ-կաթիլ: «Գյուղացին միայնակ, 1-2 տոննա բերք արտադրելով, չի կարող շուկա դուրս գալ: Մենք խնդիր ենք դնում, որ մեծաքանակ արտադրանք ապահովենք: Նախատեսվում է, որ ծրագրի մեկնարկից 12 տարի հետո 3 մարզերում հիմնված այգիներից ակնկալվող բերքից ստացվող միայն եկամուտը հասնելու է 5.5 միլիոն դոլարի»,- ավելացնում է Գ. Պետրոսյանը: «Հայկական միրգ» ԲԲԸ-ի նախնական ֆինանսավորումը կառավարությունը տրամադրելու է իր սեփական միջոցներից կամ Գյուղատնտեսության զարգացման միջազգային հիմնադրամից (IFAD) վերցված փոխառություններից: Ընկերությունն ունենալու է 4 հիմնական բաժին` 1. տնկարանային բաժին, 2. այգիների զարգացման բաժին, որը պատասխանատու է լինելու 700 հա նորատունկ այգիների հիմնադրման ու կառավարման, ինչպես նաև բերքի հետագա տնօրինման համար, 3. արտադրանքի տնօրինման բաժին, որն ունենալու է տնտեսվարման կառույց, նախնական սառեցման համակարգ և այլն, 4. մարկետինգի բաժին, որը պատասխանատու է լինելու տեղական և միջազգային շուկայում վաճառքի համար: Նշենք, որ ծրագրում որպես աշխատուժ` նախապատվությունը տալու են կին ֆերմերներին: «Գյուղական կարողությունների ստեղծման ծրագրի» գրասենյակի տնօրենի ժամանակավոր պաշտոնակատար Սերգեյ Վիրաբյանը «Հետքին» ասաց, որ արդեն աշնանը այցելելու են գյուղեր և գյուղացիներին ներկայացնելու են ծրագիրը: «Ծրագիրը պետք է կամավոր լինի, ոչ մի ստիպողական բան չի լինելու: Գյուղացու համար սա լավ բիզնես է, քանի որ հիմա ունի հող, որը չի մշակում, իսկ մի քանի տարի հետո պատրաստի այգի կունենա: Մենք ասում ենք` քեզ համար այգի հիմնենք, սարքենք, պատրաստի տանք քեզ: Մենք չենք ասում` հողը տուր մեզ, գյուղացուց ոչինչ չենք ուզում»,- նշում է Ս. Վիրաբյանը: Նա մեզ հավաստիացրեց, որ այս ծրագրից իրենք «շահ» չունեն, պարզապես ցանկանում են Հայաստանում ստեղծել արդյունաբերական գյուղատնտեսություն: Սակայն նա համամիտ չէ, որ ստեղծվելիք ընկերությունը 100 տոկոսով պետական լինի: «Իմ կարծիքով, ավելի լավ է, որ ծրագրին մասնակցեն նաև արտադրողները, գործարարները: Կարծում եմ` այդպես ավելի արդյունավետ կլինի»,- ասում է Ս. Վիրաբյանը: Այսօրվա քննարկումների մասնակիցների ցանկում ընդգրկված էին նաև Արագածոտնի, Տավուշի և Վայոց ձորի մարզպետները, սակայն նրանք նպատակահարմար չէին համարել անձամբ մասնակցել իրենց մարզին վերաբերող քննարկումներին և ուղարկել էին վարչության պետերին: Վայոց ձորի նորանշանակ մարզպետ Սերգեյ Բագրատյանն աշխատանքային քննարկմանն ուղղարկել էր քաղաքաշինության վարչության պետին: Երբ փորձեցինք նրանից տեղեկություններ ստանալ, պատասխանեց, որ ոչ մի հարցով մեզ չի կարող օգտակար լինել, քանի որ ինքը «թեմայից հեռու է»: «Ինձ հետաքրքրում է միայն, որ իմ կերած միրգը համով լինի»,- ասաց վարչության պետը: