Երեկ երեկոյան Տիկնիկային թատրոնում կայացավ «Քաղաքը հանուն կյանքի» բարեգործական համերգը, որի ընթացքում եւս քաղաքացիները հնարավորություն ունեին դրամական օգնություն ցուցաբերել 4-ամյա Էրիկ Սարգսյանին, ով հիվանդ է ավշային հանգույցների քաղցկեղով եւ ներկայումս բուժվում է Ռուսաստանում: Համերգի ընթացքում «Հանուն կյանքի» նախաձեռնող խմբի անդամները վաճառում էին գրքեր եւ ձայնասկավառակ, որոնցից ստացված հասույթի 1/2-ը, իսկ որոշների դեպքում ամբողջությամբ փոխանցվել է Էրիկի մայրիկի բանկային հաշվեհամարին: Համերգից, գրքերի եւ ձայնասկավառակի վաճառքից, ինչպես նաեւ մարդկանց նվիրատվություններից ընդհանուր հաշվով գոյացել էր 720 հազար դրամ, որից 700 հազարն արդեն փոխանցվել է փոքրիկի ծնողներին: «Հանուն կյանքի» նախաձեռնող խումբը շարունակում է դրամահավաքը մինչեւ Էրիկի վերջնական ապաքինումը: Հաջորդ լինելու է «Ֆուտբոլը հանուն կյանքի» ակցիան, որը կազմակերպելու են Հայաստանում Ռեալ Մադրիդի ֆան ակումբը եւ ընկերները: