Երեկ տեխնոլոգիաների լրահոսներում հաղորդագրություններ տարածվեցին, որ Google ընկերությունը գնել է Social Gold ծառայությունը, որը հայտնի է որպես սոցիալական ցանցերի խաղերում վիրտուալ տնտեսությունները պահելու, վճարումներ կատարելու տեխնոլոգիաների ամբողջություն: Գործարքի արժեքի մասին պաշտոնական տեղեկատվությունը բացակայում է, սակայն տեղեկատվական տեխնոլոգիաների բլոգների անանուն աղբյուրները նշում են 70-75 միլիոն դոլարի մասին: Այս գործարքը վերջին օրերի երկրորդ ոչ այնքան խոշոր գործարքն է համաշխարհային հսկայի համար: Օրեր առաջ Google-ը գնել էր նաեւ սոցիալական ցանցերի խաղեր արտադրող Slide ընկերությունը շուրջ 200 մլն դոլարով, իսկ շաբաթներ առաջ 100 մլն դոլար ներդրում էր կատարել սոցիալական ցանցերի խաղեր արտադրող Zynga ընկերությունում, որը հայ ինտերնետ օգտագործողներին հայտնի է դարձել սոցիալական Facebook-ի Farmville և Mafiawars խաղերով: Ինչու՞ է որոնողական հսկան վերջին շրջանում շռայլ ներդրումային քաղաքականություն վարում: Խոսակցություններ կան, որ Google-ն իրականում ստեղծում է հարմարավետությամբ անգերազանցելի սոցիալական ցանց: Վերջին ժամանակներս Google-ի կատարած թանկարժեք գնումներին զուգահեռ թեժացել են նաեւ այն խոսակցությունները, որ համաշխարհային հսկան փորձում է իր ընտանիքը համալրել սոցիալական ցանցերին հատուկ վեբ բովանդակությամբ եւ տեխնոլոգիաներով: Google-ն այսօր ունի մի շարք արտադրանքներ, որոնք կարող են էլ ավելի արժանահավատ դարձնել նման խոսակցությունները` YouTube, Google Talk, Google Reader, եւ Blogger: Google-ը նման եկամտաբեր նախագիծ կարող է սկսել այն բանից հետո, երբ Facebook բառը գրավել է առաջին տեղը որոնողական հարցումներով: Վերջին մեկ տարում համաշխարհային տիրապետության ձգտող ընկերությունը շարունակ հայտարարում է նոր նախագծերի մասին, որոնցից շատերի սկսման ժամկետը նշել են 2010-ի աշնանը: Արդյո՞ք այս աշնանը Google-ը կունենա համաշխարհային սոցիալական ցանց, դեռեւս պարզ չէ, սակայն շռայլ ներդրումները խոստանում են Google-ից անակնկալներ սպասել մոտակա ժամանակներում: