«Ձու» օպերացիայի նոր մանրամասները Ձվի շուկայում նոր մոնոպոլիստ ծնվեց. «X գրուպի» նախագահ, հայտնի գործարար Խաչատուր Խաչատրյանը, որին պատկանող Երեւանի թռչնաբուծական ֆաբրիկան հուլիսի 19-ին 21 մլն դոլարով երեք թռչնաբուծարան գնեց` «Լուսակերտ» ՍՊԸ-ն, «Շիրակ» ՍՊԸ-ն ու «Գնդեվազի թռչնաֆաբրիկա» ՓԲԸ-ն: Հենց նույն օրն այս ձեռնարկությունների նոր տերը հրահանգեց բարձրացնել ձվի գինը, եւ արդեն երեկ ԵԹՖ-ի, «Լուսակերտի» եւ մյուս խոշորների ձվերը Երեւանի խանութներում վաճառվում էին 30-40 դրամով: Սա ապացուցում է, որ նախկին գինը` 10-22 դրամ, արհեստական էր, եւ ԵԹՖ-ն այն սահմանել էր շուկան գրավելու համար: Բայանդուր գյուղի մոտ գտնվող «Շիրակ» թռչնաբուծարանը, որը խորհրդային լավագույն տնտեսություններից էր, վաճառվել է 7,5 մլն դոլարով: Դրա նախկին տերը` ԱԺ պատգամավոր Մուրադ Գուլոյանը, մեկ տարի առաջ կառավարությունից աջակցություն ստացող տեղական արտադրողներից էր, որոնց ցուցակը մեր բլոգեր եւ հրապարակայնության կողմնակից վարչապետը գաղտնի է պահում եւ կառավարության կայքէջում խուսափում է հրապարակել: Գուլոյանը մոտ 2 մլն դոլարի հակաճգնաժամային աջակցություն է ստացել պետությունից, որը, սակայն, ըստ լավատեղյակ մարդկանց, ծառայեցրել է ոչ թե Բայանդուրի տնտեսության նախկին փառքի վերականգնմանը, այլ բենզալցակայանների բիզնեսի բարգավաճմանը Շիրակի մարզում: Շահութաբեր փնթիություն «Աշխատավարձերի եւ սոցիալական վճարների գծով պարտքերի կուտակումը համայնքների թափթփված աշխատանքի արդյունք է»,- հայտարարել է տարածքային կառավարման փոխնախարար Վաչե Տերտերյանը: «ՉԻ» - Տեղեկացնենք, որ այսօրվա գծով միայն աշխատավարձի մասով կուտակված պարտքերը կազմում են մոտ 500 մլն դրամ: Փաստորեն, ինչ-որ մարդիկ «թափթփված են աշխատել» եւ այդքան գումար չեն վճարել: Երեւի մոռացել են կամ սափրված չեն եղել: Հետո ի՞նչ, որ չար լեզուները պնդում են, թե իբր «ոլորտի պատասխանատուները» պարզապես մի քանի ամսով շրջանառության մեջ են դնում այդ գումարները եւ կարգին շահույթ ստանում: Մենք, իհարկե, նման խոսակցություններին չենք հավատում: Փնթիությունն ամենահարմար տարբերակն է: Կարեւորն այն է, որ, ըստ պարոն Տերտերյանի` «պարտքերի մարման ուղղությամբ աշխատանքները շարունակվում են»: Հետաքրքիր է` ի՞նչ կա «աշխատելու». պետք է պարզապես փոխանցել գումարները, ու վերջ: Թե՞ կառավարությունում էլ են գերադասում թափթփվել: Դեռ հստակ չէ, թե «Ա1+»-ը որ մրցույթներին կմասնակցի ՀՌԱՀ-ը երեկ հրապարակեց թվային հեռարձակման ցանցի միջոցով եթերային հեռարձակում իրականացնելու հեռուստահեռարձակողների լիցենզավորման 18 մրցույթների վերաբերյալ իր հայտարարությունը: «Առավոտի» հարցին, թե հատկապես ո՞ր մրցույթին է մասնակցելու «Ա1+»-ը, ընկերության գլխավոր պրոդյուսեր Սուսաննա Օհանջանյանը պատասխանեց, որ վերջնական որոշում կկայացնեն, երբ կհրապարակվեն նաեւ մյուս 7 մրցույթների վերաբերյալ հայտարարությունները, որոնց վերաբերյալ որոշում ՀՌԱՀ-ն ընդունելու է հանձնաժողովի հուլիսի 22-ի նիստում: Հարկադիր վայրէջք Կիրակի օրը Երեւան-Մոսկվա ուղղությամբ չվերթ իրականացնող ինքնաթիռն օդ բարձրանալուց 10 րոպե անց հետ է շրջվել եւ հարկադրաբար վայրէջք իրականացրել «Զվարթնոց» օդանավակայանում: Ուղեւորները պատմում են, որ երբ ինքնաթիռը բարձրանալիս է եղել, ուժեղ վիբրացիա է զգացվել, եւ ամբողջ ինքնաթիռը մի պահ թափահարվել է, ինչի հետեւանքով ինքնաթիռի մեջ մեծ խուճապ է առաջացել: Բարեբախտաբար, օդաչուները կարողացել են բարեհաջող վայրէջք կատարել: Դեպքը տեղի է ունեցել «Աէրոֆլոտ» ընկերությանը պատկանող «Ա 320» ինքնաթիռի հետ: Պարզվել է, որ ինքնաթիռի շարժիչի աշխատանքը խափանվել է, քանի որ դրա մեջ թռչուն է ընկել: Ըստ «Աէրոֆլոտի» տնօրեն Վադիմ Կովալենկոյի` «Զվարթնոցում» թռչունների առկայությունն առաջին անգամ չէ, որ խնդիրներ է առաջացնում օդաչուների համար, եւ այժմ ընկերությունը պատրաստվում է դիմել «Զվարթնոցի» ղեկավարությանը եւ կոչ անել շտկել օդանավակայանում առկա խնդիրները: Այս տարվա ընթացքում «Աէրոֆլոտին» պատկանող Երեւան-Մոսկվա արդեն երկրորդ չվերթն է, որ խափանվում է «Զվարթնոցի» տարածքում ազատ ճախրող թռչունների պատճառով: