![](/static/articles/46/28/l-5y8TkL6eKI.jpg)
Դաշտ գյուղում թե եկեղեցին է դաշտային, թե մշակույթի տունը
Արմավիրի մարզի Դաշտի համայնքապետարանի եւ դպրոցի հարեւանությամբ խաչքար է դրված: Մի տարեց կին, պայքարելով քամու դեմ, ճիգեր էր գործադրում, որպեսզի մեկ զույգ մոմ վառեր:
Պարզվեց, որ Դաշտի միակ սրբատեղին հենց գլխավոր մայրուղու հարեւանությամբ գտնվող խաչքարն է, քանի որ գյուղը եկեղեցի չունի: Խաչքարն էլ տեղադրվել է համայնքապետարանի միջոցներով, որպեսզի հավատացյալ ժողովուրդը գոնե փողոցում մոմ վառելու հնարավորություն ունենա եւ դրա համար չհասնի Էջմիածնի եկեղեցի:
Մինչ տարեց կինը մոմ վառելու համար կռիվ էր տալիս քամու հետ, նրա համագյուղացիները շտապում էին դպրոց:
Գյուղում այսօր նշում էին Հայաստանի Անկախության տոնը: Միջոցառումը մեծ չէր, քանի որ համայնքը մեծ միջոցառումներ անելու տեխնիկական հնարավորություններ չունի: Պարզվում է` գյուղի միակ բարեկարգ տարածքը դպրոցն է, իսկ եթե այնտեղ էլ հնարավոր չէ միջոցառումներ կազմակերպել, ապա դրանք արվում են հենց գյուղապետարանի շենքի դիմաց` աստիճաններն էլ օգտագործելով որպես բեմահարթակ:
Գյուղի միակ մշակույթի տունը, որը վթարային է, իր հարկի տակ տեղ է տվել համայնքապետարանին, ամբուլատորիային, գրադարանին` այդպիսով կորցնելով իր բուն նշանակությունը: Դաշտի գյուղապետի տեղակալ Հարություն Մուրադյանը «Հետքի» հետ զրույցում ասաց, որ մշակույթի տան շենքի 50-ամյակը շուտով կլրանա, սակայն վերջին անգամ այն վերանորոգվել է խորհրդային տարիներին:
«Մոտավոր հաշվարկներով` 30 մլն դրամ է անհրաժեշտ, որ տանիքը փոխվի, մի քիչ էլ ներսում հարդարման աշխատանքներ կատարվեն: Ճոխ չէ, բայց գոնե կոսմետիկ վերանորոգում էլ որ արվի, էլի լավ է»,-ասում է Հ. Մուրադյանը:
Գյուղապետարանի միջոցներով արտաքին պատերը սվաղել են, որպեսզի քարերը չխախտվեն, մինչեւ պետությունը ուշադրություն դարձնի, կամ էլ կհայտնվի մի բարերար եւ ցանկություն կհայտնի փրկել մշակութային օջախը:
Մշակույթի տան պատերն ամբողջությամբ խոնավության մեջ են, քանի որ անձրեւների ժամանակ տանիքից թափված ջրերը շենքը վերածում են «փակ լողավազանի»:
Մեկնաբանել