Դավիթ Քիրամիջյանի եւ Սարգիս Գեւորգյանի գործով դատական նիստն այսօր հետաձգվեց մինչեւ հուլիսի 30-ը, քանի որ վերջինիս պաշտպան Ստեփան Ոսկանյանը ծանոթ չէր քրեական գործի նյութերին: Ընդդիմադիր ակտիվիստ Դավիթը մեղադրվում է «խուլիգանության» մեջ:

Ըստ մեղադրանքի` 2010թ. մայիսի 31-ին` ժամը 18:00-ի սահմաններում, Դավիթ Քիրամիջյանը Մարտիրոս Սարյանի արձանին հարող տարածքում վիճաբանել է պատահական անցորդ Վարազդատ Թադևոսյանի հետ, բռնություն գործադրել նրա նկատմամբ` ձեռքերով եւ ոտքերով հարվածներ հասցնելով նրա մարմնի տարբեր մասերին: Մեղադրանքում նշված է, որ Դավիթ Քիրամիջյանին բերման ենթարկելիս քաղաքացի Սարգիս Գևորգյանը կյանքի և առողջության համար ոչ վտանգավոր բռնություն է գործադրել իշխանության ներկայացուցիչ հանդիսացող, իր ծառայողական պարտականությունները կատարող` ՀՀ ոստիկանության ՊՊԾ գնդի ոստիկան Արկադի Բաղդասարյանի նկատմամբ, այն է` քաշքշել է նրան և պոկել ուսադիրը: Սարգիս Գեւորգյանին մեղադրանք է առաջադրվել «իշխանության ներկայացուցչի նկատմամբ բռնություն գործադրելու» համար: Երիտասարդները պնդում են, որ իրենք անմեղ են եւ որ իրենց նկատմամբ, ինչպես եւ շատ ընդդիմադիրների, «գործ են սարքել»: Դավիթն ու Սարգիսը լրագրողների հետ զրույցում ասացին, որ իրենք չեն ակնկալում արդար դատական քննություն:

«Դատարանը բացարձակ վստահություն չի ներշնչում, Մնացական Մարտիրոսյանին (գործը քննող դատավորին) բոլորս էլ լավ ենք ճանաչում, գիտենք, թե նա ինչպես է քննում գործերը»,- ասաց Սարգիս Գեւորգյանը: Նշենք, որ մեղավոր ճանաչվելու դեպքում Դավիթ Քիրամիջյանին եւ Սարգիս Գեւորգյանին սպասվում է առավելագույնը 5 տարի ազատազրկում կամ տուգանք: