S.O.S Արգիճի նախաձեռնող խմբի անդամները համոզված են, որ ՀՀ բնապահպանության նախարարության հայտարարությունն այն մասին, որ Արգիճի գետի վրա պարզապես վերանորոգում են խողովակներ, կեղծիք է: Այս մասին «ԷկոԼուր»-ին հայտնեցին նախաձեռնող խմբի ակտիվիստներ Վարդան Գալստյանը և Պայծառ Աղաբաբյանը: Հիշեցնենք, որ Գեղարքունիքի մարզի Մարտունու շրջանի 6 համայնքների բնակիչները շարունակում են ահազանգել, որ Վայոց ձորում կառուցվող ՀԷԿ-ի համար փոխում են իրենց հողատարածքների համար ոռոգման ջուր մատակարարող Արգիճի գետի Գայլաձոր վտակի հունը. անջուր է մնալու 30 հազար բնակիչ, իսկ Գայլաձորի ջուրը այլևս չի թափվելու Սևանա լիճ: Վարդան Գալստյանը վստահեցրեց, որ մոտ 10 տարի առաջ Աղնջաձոր համայնքին ջուր տրամադրելու համար Աստղաձոր համայնքում տեղադրվել է 250 միլիմետր տրամագծով, ժամանակակից տեխնոլոգիաներով պատրաստված խողովակաշար: «Այդ խողովակաշարը ներկայումս փոխարինում է խորհրդային տարիների 150 միլիմետր տրամագծով երկաթյա խողովակաշարին, որն այժմ չի գործում: Սակայն  2009թ. մոտ 2 կմ երկարությամբ լեռան կուրծքը բացել են, կառուցել են խրամուղ և ամբարտակ և տեղադրել 530 միլիմետր տրամագծով խողովակաշար, ինչը ենթադրել է տալիս, որ այդ խողովակաշարով մեծաքանակ ջուրը պետք է տեղափոխվի Վայոց ձոր»,- ասաց Վարդան Գալստյանը: Ըստ ակտիվիստների՝ մի անգամ արդեն փորձ արվել է ջուրը նորակառույց խողովակով Վայոց ձոր ուղղել, սակայն այն հաջողության չի հասել. ջուրը դուրս է եկել խրամուղից և գահավիժել Գայլաձոր: Այդ տարածքում կան բնական աղբյուրներ, որոնք թափվում էին Գալաձորի մեջ, սակայն այդ շինարարությունից հետո լցվում են խրամուղի մեջ ու կորչում: ՀՀ բնապահպանության նախարար Արամ Հարությունյանը հանձնարարել է դադարեցնել Վայոց ձորի ՀԷԿ-ի կառուցումը մինչև փաստաթղթերի ուսումնասիրությունը: Սակայն այս հանգամանքը բնակիչներին հույս չի ներշնչում: «Մենք համոզված կլինենք, որ դադարեցված է, երբ կքանդվի Գայլաձոր վտակի վրա կառուցված ամբարտակը»,- ասաց Պայծառ Աղաբաբյանը: 27.07.2010թ.