Ֆլեշ մոբը հայերեն բառացի թարգմանվում է «կայծակնային ամբոխ»: Այն նախօրոք պլանավորված միջոցառում է, որի ժամանակ մարդկանց մի մեծ խումբ անսպասելի հայտնվում է որևէ հասարակական վայրում, մի քանի րոպեի ընթացքում կատարում նախօրոք պայմանավորված գործողություններ, իսկ հետո միաժամանակ արագ ցրվում այնպես, կարծես ոչինչ էլ չէր պատահել: Ֆլեշ-մոբն ունի իր հստակ կանոնները: Հայկական երկրորդ ֆլեշ մոբը խախտեց որոշ կանոններ և հայտարարեց կայանալիք ֆլեշ մոբի մասին` զանգվածային տեղեկատվություն տրամադրելով: Սակայն սա ևս ուներ իր պատճառները: Նպատակն այն էր, որ ֆլեշ մոբ-շարժմանը մասնակցեին որքան հնարավոր է շատ մարդիկ և Հայաստանում շատերն իմանային, թե ինչ այն իրենից ներակայցնում: Աշխարհում առաջին ֆլեշ-մոբը կազմակերպվել է Մանհեթենում 2003 թվականին: Մինչ այսօր բազում հետաքրքիր ֆլեշ-մոբեր են տեղի ունեցել ամբողջ աշխարհում: Չինաստանում մարդիկ հավաքվել են մեկ տեղում, որպեսզի միասին իջեցնեն խանութի գները: Լոնդոնում հայտնի «Լուռ դիսկո» ֆլեշ-մոբը ամենահայտնիներից է: Երիտասարդները 2006 թվականի ապրիլին հավաքվել էին Լոնդոնի անցումներից մեկում, դրել իրենց ականջակալները և բոլորով միասին պարել լռության մեջ: Սրան մասնակցել էր մոտ 4000 մարդ: Կան նաև միջազգային ֆլեշ-մոբեր: 2008 թվականի մարտի 22-ին աշխարհի 25 տարբեր քաղաքներում միաժամանակ կազմակերպվել է բարձերի կռիվ: Ֆլեշ-մոբերը հիմնականում պարունակում են որևէ իմաստ, ասելիք են ունենում: «Հայկական ֆլեշ-մոբ դիվիզիայի» կողմից կազմակերպված առաջին ֆլեշ-մոբը նվիրված էր Մեծ Եղեռնի 95-րդ տարելիցին: Երկրորդ ֆլեշ-մոբն ապացուցում էր, որ Հայաստանում կան մարդիկ, ովքեր իսկապես անտարբեր չեն գրքի նկատմամբ: Երիտասարդները բոլորը միաժամանակ սկսեցին գիրք կարդալ: «Ֆլեշ-մոբերը միշտ էլ եղել են: Նոր աշխարհի ֆլեշ-մոբերներից էլ Նոյն էր և իր տղաները, որ կայծակնային արագությամբ իջան Արարատի լանջին, հետո կայծակնային արագությամբ էլ ցրվեցին տարբեր ուղղություններով: Պարզապես այդ ժամանակ դեռ անգլերենը տարածված չէր, և Նոյը չգիտեր, որ դա ֆլեշ-մոբ է»,- կեսկատակ-կեսլուրջ ասում է «Հայկական ֆլեշմոբ դիվիզիայի» հիմնադիրներից Արմեն Սուքիասյանը: «Այն, որ բոլոր անցորդները քեզ են նայում ապշած և փորձում հասկանալ, թե դու ինչ ես ուզում դրանով ասել, արդեն հաճելի է ինձ նման ուշադրություն սիրող մարդու համար: Էլ չեմ խոսում, որ այդ հաճույքը նաև օգտակար է հանրությանը»,- ասում է ֆլեշ մոբերի մասնակից Աննա Ներսիսյանը: «Փոքր-ինչ ժամանակատար և աշխատատար էր մեր հանրության մեջ ֆլեշ մոբ հասկացությունը մտցնելը, բայց մեզ` խենթ ու խելառներիս, դա հաջողվեց: Մենք այսօր արդեն շատ ենք և ուժեղ»,-ասում է Արմեն Սուքիասյանը: Հայերը փոքր-ինչ բարդույթավորված ազգ են, և ֆլեշ-մոբն իր տարօրինակ, խենթ արարքներով Հայաստան բերելը դժվար է եղել, իսկ թե ինչպես այն կդիմանա հայկական իրականության փորձություններին, ցույց կտա ժամանակը: Մարինե Քոչարյան