Ոտնձգությունների ենթարկվածների բողոքը կքննվի օգոստոսի 3-ին
Նուբարաշենի թիվ 11 հատուկ դպրոցի նախկին սաներ Դ.Ա.-ի եւ Հ.Ս.-ի բողոքը վերաքննիչ դատարանում կքննվի օգոստոսի 3-ին, ժամը 15:30-ին: Աղջիկները բողոքարկում են Էրեբունի եւ Նուբարաշեն վարչական շրջանների ընդհանուր իրավասության դատարանի կայացրած դատավճիռը, որով նույն դպրոցի նախկին ուսուցիչ Լեւոն Ավագյանը դատապարտվել է 2 տարվա ազատազրկման:
Հիշեցնենք, որ հուլիսի 21-ին վերաքննիչ քրեական դատարանում պետք է սկսվեր աղջիկների բողոքի քննությունը, որից առաջ նախագահող դատավոր Մհեր Աղրամանյանը ընթերցեց բողոքաբեր Դ.Ա.-ից ստացված դիմումը, որով նա հետ էր վերցնում իր բողոքը:
Նախկին սաների փաստաբան Ավագ Լալայանը հայտարարեց, որ իր տեղեկություններով` Դ.Ա.-ին հրավիրել են ոստիկանություն, որի արդյունքում էլ, հավանաբար, «ծնվել» է այս դիմումը: Սակայն դատարանը ուշադրություն չդարձրեց փաստաբանի հայտարարությանը:
Դատական նիստը հետաձգվեց անորոշ ժամանակով, որպեսզի ապահովվի մյուս բողոքաբերի` Հ.Ս.-ի ներկայությունը եւ ճշտվի նրա դիրքորոշումը բողոքի վերաբերյալ: Վերջինս «Հետքի» հետ զրույցում ասաց, որ ինքը չի պատրաստվում հրաժարվել իր բողոքից:
Մեկնաբանել