«Հայաստան» համահայկական հիմնադրամը սկսել է Լեռնային Ղարաբաղի Հանրապետության Ասկերանի շրջանի Ավետարանոց գյուղի ջրամատակարարման համակարգի կառուցումը: Ծրագիրն իրականացվում է Հիմնադրամի Ֆրանսիայի տեղական մարմնի եւ ԼՂՀ կառավարության համաֆինանսավորմամբ: Նախորդ դարի 60-ականներին կառուցված ջրամատակարարման համակարգը շարքից դուրս է եկել: Խողովակները քայքայված են ու հողի մակերեւույթին շատ մոտ են գտնվում, ուստի հաճախ վնասվում են, եւ ջրի կորուստն անխուսափելի է դառնում: Գյուղապետ Հովիկ Գաբրիելյանի խոսքով` գյուղի մի մասը օրական մեկ ժամ է ջուր ստանում, իսկ նորաստեղծ տնտեսություններն ընդհանրապես ջուր չունեն: Կենցաղային կարիքները հոգալու համար գյուղացիները ստիպված են ջուր կրել գյուղի աղբյուրներից: «Ձմռան ցրտին ու ամառվա շոգին հերթ ենք կանգնում աղբյուրի մոտ, որ մի քանի դույլ ջուր տանենք տուն: Էս երեխեքն էլ են մեղք»,- մատնացույց անելով աղբյուրի մոտ դույլը ձեռքներին կանգնած դպրոցահասակ երեխաներին` ասաց գյուղացի մի կին: «Արցախցի գյուղացու կողքին կանգնելը մեր ամենակարեւոր պարտականություններից մեկն է: Կանոնավոր ջրամատակարարումը անհրաժեշտություն է բնակիչների բարօրության եւ տնտեսական զարգացման համար: Սա մեր երրորդ ջրի ծրագիրն է Ասկերանի շրջանում. ընթացքում են նաեւ Ասկերան քաղաքի ու Նորագյուղ համայնքի ջրամատակարարման համակարգերի վերակառուցման ծրագրերը»,-ասաց Հիմնադրամի Ֆրանսիայի տեղական մարմնի ատենապետ Պետրոս Թերզյանը: Այժմ ընթանում են հողային աշխատանքները. ճանապարհ է բացվում դեպի աղբյուրներ: Ծրագրի առաջին փուլով նախատեսվում է գյուղից 5 կմ հեռավորության վրա` Քիրսի սարի ստորոտում գտնվող երեք աղբյուրների մոտ կառուցել ջրհավաք կառույցներ: Նոր անցկացվող ջրատարով ջուրը կհասցվի գյուղ: Գյուղի բարձրադիր մասում կկառուցվի 100 մ3 օրական կարգավորման ջրամբար: Որպես համակարգի մաս, կօգտագործվեն նաեւ ներկայումս շահագործվող երեք ջրամբարները (ընդհանուր առմամբ 160 մ3 տարողությամբ), որոնք մի քանի տարի առաջ են վերանորոգվել: Երկրորդ փուլով կկառուցվի 15 կմ երկարությամբ ներքին ցանց. խողովակների տրամագիծը հաշվարկվել է` հաշվի առնելով գյուղի հեռանկարային ընդլայնումն ու զարգացումը: Տների մուտքագծերի վրա կտեղադրվեն զտիչ սարքեր ու ջրաչափեր: Արդեն 2011 թ. ամռանը գյուղի բոլոր 260 ընտանիքները (շուրջ 1130 բնակիչ) կապահովվեն կանոնավոր ջրամատակարարմամբ: Այս մասին տեղեկացնում է «Հայաստան» համահայկական հիմնադրամի հասարակայնության հետ կապերի բաժինը: