Ավագյանը հրաժարվեց հանրային պաշտպանից
Նուբարաշենի թիվ 11 հատուկ դպրոցի նախկին սան Հ. Ս. –ի փաստաբանները քիչ առաջ ինքնաբացարկի միջնորդություն ներկայացրեցին վերաքննիչ քրեական դատարանի կազմին (նախագահությամբ Մհեր Աղրամանյանի): Փաստաբանների հիմնավորումն այն է, որ դատարանն առանց պարզելու, թե արդյոք բողոքը բերող Դ. Ա.-ն է գրել դիմումը, այն որպես հիմք է ընդունել: Մինչդեռ փաստաբանները նախորդ դատական նիստին կասկած էին հայտնել, որ հատուկ դպրոցի սանը չէր կարող նման բովանդակությամբ դիմում գրել:
Մեղադրող դատախազն ու ամբաստանյալ Լևոն Ավագյանը կարծում են, որ փաստաբանների միջնորդությունն անհիմն է: Նշենք, որ Լևոն Ավագյանի պաշտպան Վիկտորիա Սահակյանը թեև գրավոր պատասխան էր ներկայացրել, այնուամենայնիվ, դատարանին տեղեկացրել էր, որ ինքն այլևս Լևոն Ավագյանի պաշտպանը չէ: Ավագյանը նշեց, որ իրեն պաշտպան պետք չէ, և ինքն անձամբ կարող է զբաղվել իր պաշտպանությամբ:
Դատարանը հարցրեց, որ եթե ամբաստանյալը ֆինանսական խնդիրներ ունի, դատարանը կարող է հանրային պաշտպան նշանակել, Ավագյանը մերժեց դատարանի առաջարկը: Դատարանն ընդմիջեց նիստը ինքնաբացարկի միջնորդությունը քննարկելու համար, սակայն ընդմիջումից հետո մերժեց այն:
Մեկնաբանել