Օպերատիվ հիդրովերլուծաբանության կենտրոնի պետ Զարուհի Պետրոսյանն այսօր տեղեկացրեց, որ նախորդ շաբաթ Հանրապետությունում անձրեւ ընդհանրապես չի տեղացել, ջերմաստիճանը տատանվել է 34-35 աստիճաններում: Առաջիկայում եւս սպասվում է առանց տեղումների եղանակ, օգոստոսի 6-ից ջերմաստիճանը կբարձրանա եւս 1-2 աստիճանով, առավելագույնը կարող է հասնել 38 աստիճանի: Այս ամենի արդյունքում երկրում ստեղծվել է հրդեհավտանգ իրավիճակ:

Նախորդ տարվա համեմատությամբ` հրդեհների թիվը կտրուկ աճել է, եւ սրա պատճառը ոչ միայն բարձր ջերմաստիճանն է, այլեւ մարդկային գործոնն է: Մասնագետները նշում են, որ հրդեհներ առավել շատ բռնկվում են այն վայրերում, որտեղ հանգստանում են մեր քաղաքացիները: Զարուհի Պետրոսյանը կոչ է անում անտառում հանգստանալիս մարել խարույկը եւ թափոններ չթողնել: «Նույնիսկ ապակու փոքրիկ կտորը կարող է հրդեհի պատճառ դառնալ»,- ասաց նա: Հրդեհի բացասական ազդեցությունը մարդկանց վրա երկակի է: Առաջինը կրակի բոցի եւ ջերմային ալիքի անմիջական ազդեցությունն է, իսկ երկրորդը` թունավոր գազերով մթնոլորտի աղտոտումը, որն ավելի լայն մասշտաբներ է գրավում: