Գայանե Բաբայանին վրաերթի ենթարկած վարորդը հրաժարվեց պատասխանել հարցերին
Գրող, հրապարակախոս, լրագրող Գայանե Բաբայանի մահվան պատճառ դարձած Վահան Եղիազարյանի ձեռքերը դողում էին: Նա հրաժարվեց պատասխանել դատավորի, մեղադրյալի եւ տուժողի ներկայացուցիչների հարցերին, միայն ասաց, որ պնդում է նախաքննության ժամանակ տված իր ցուցմունքները: 27-ամյա Վահանն ընդունեց իր մեղքը: Նա, ապրիլի 9-ին` ժամը 21-ի սահմաններում, հարբած վիճակում խախտելով երթեւեկության կանոնները, Դավիթ Անհաղթի փողոցում վրաերթի է ենթարկել Գայանե Բաբայանին:
«Քույրս տաղանդավոր գրող էր, համարձակ լրագրող, լավ քաղաքացի էր, նախընտրում էր ապրել իր ընկեր Հրանտ Մաթեւոսյանից ստացած հանրակացարանում, նա ընտանիքի միակ կերակրողն էր,- դատարանում Գայանե Բաբայանին ներկայացրեց քույրը` Աիդա Բաբայանը:- Այդ օրը նա աշխատավարձ էր ստացել, գնացել էր գնումների, որպեսզի տոնական ընթրիք կազմակերպի...»,- արցունքները խանգարեցին խոսքը շարունակել:
Աիդա Բաբայանը նշեց, որ ոչ մի պատիժ եւ դրամական փոխհատուցում չի կարող մեղմել Գայանեի ընտանիքի եւ հարազատների ցավը, սակայն Վահան Եղիազարյանից պահանջում են 5 միլիոն դրամ փոխհատուցում, որն անհրաժեշտ է Գայանեի դստեր ուսման ծախսերը հոգալու համար: Դատարան կանչված վկա Դավիթ Շահնազարյանը պատմեց, որ ինքը, սուպերմարկետից դուրս գալով, տեսել է Գայանե Բաբայանի շուրջ հավաքված մարդկանց, որոնք փորձել են շտապօգնություն զանգահարել: «Ես զանգեցի շտապօգնություն, բայց մինչեւ իմ զանգած մեքենան կգար, հանդիպակաց մայթով անցնում էր շտապօգնության մեկ այլ մեքենա: Դա կանգնեցրինք, եւ տեղափոխեցին հիվանդանոց»,- պատմեց վկան:
Դատարան կանչված մեկ այլ վկան` Դավիթ Հալաջյանը, ով մեղադրյալ Վահան Եղիազարյանի հորաքրոջ որդին է, այնքան հուզված էր, որ չէր կարողանում բարձրաձայն պատասխանել դատավորի հարցերին: Հալաջյանի վկայությամբ` ինքն ու Վահանը միասին օղի էին խմել, քանի որ ապրիլի 3-ին Վահանի առաջնեկն էր լույս աշխարհ եկել: Վկան նշեց, որ ինքը Վահանից շատ էր խմել: Դավիթ Հալաջյանի խոսքով` ինքը նստել է այն շտապօգնության մեքենան, որով Գայանե Բաբայանին տեղափոխել են հիվանդանոց:
Տուժողի իրավահաջորդի ներկայացուցիչ Հակոբ Ճարոյանը, կասկածելով, որ Հալաջյանը ականատես չի եղել պատահարին, հարցրեց, թե ինչ էր այդ օրը Գայանե Բաբայանի հագին: Տղան երկար մտածելուց հետո ասաց. «Երկարաթեւ ժակետ եւ տրիկո»: Իսկ Գայանե Բաբայանի դուստրը` Լուիզան, «Հետքին» ասաց, որ մահվան օրը մայրը զգեստով է եղել:
Գայանեի քույրերը պնդում են, որ Դավիթ Հալաջյանը ստում է: Վահան Եղիազարյանի պաշտպան Կարինե Ավանեսյանը բողոքեց Աիդա Բաբայանի գործողությունների դեմ, որը, ըստ պաշտպանի, ճնշում է գործադրում վկայի նկատմամբ` նրան անվանելով ստախոս: Աիդա Բաբայանը նշեց, որ ինքը հուզված վիճակում վիրավորական բառեր է արտաբերել, սակայն դա ուղղված չի եղել վկային: Ողջ դատական նիստը անցնում էր բավականին լարված մթնոլորտում, դատավոր Լյովա Ավետիսյանը հաճախ դիտողություններ էր անում ներկաներին` ստիպելով նրանց ներողություն խնդրել կամ լքել դահլիճը: Երբեմն էլ սպառնում էր, որ տուգանքներ կնշանակի: Սա ավելի էր թեժացնում մթնոլորտը, որի արդյունքում դատական նիստը ընդհատվեց վիճաբանության պատճառով:
Ընդմիջման ժամանակ վկա Դավիթ Հալաջյանը նստել էր Վահան Եղիազարյանի պաշտպան Կարինե Ավանեսյանի կողքին: Սա նկատեցին Գայանե Բաբայանի հարազատները եւ ընդմիջումից հետո դատավորին տեղեկացրին, որ «պաշտպանը սովորեցնում է, թե վկան ինչ ցուցմունքներ տա»: Կարինե Ավանեսյանն էլ հայտարարեց, որ վկային ոչինչ չի տվել կարդալու, եւ որպեսզի կասկածները փարատվեն, հրաժարվեց վկային հարցեր տալու իր իրավունքից: Տուժողի իրավահաջորդ Աիդա Բաբայանը խնդրեց հետաձգել դատական նիստը, քանի որ ինքը երեխայի է սպասում, եւ ինքնազգացողությունը վատացել է: Դատական քննությունը կշարունակվի օգոստոսի 18-ին:
Հ.Գ. Վահան Եղիազարյանը նախաքննության մարմնին հայտնել է, թե աշխատում է «Բաբիկ» ՍՊԸ-ում որպես վարորդ, սակայն դատարանում հայտարարեց, որ ոչ թե աշխատում է, այլ երբեմն ընկերոջն է փոխարինել: Սա կասկած առաջացրեց տուժողի ներկայացուցիչների մոտ, եւ նրանք փորձեցին պարզել, թե Վահանն ինչու է թաքցնում իր աշխատելու հանգամանքը, սակայն տղան հրաժարվեց պատասխանել նրանց հարցերին:
Մեկնաբանել