Ոստիկանների թիվը չի բավականացնում օրինախախտ հետիոտներին պատժելու համար
2009 թվականի հոկտեմբերից ճանապարհային ոստիկանները տուգանում են նաեւ փողոցը չսահմանված տեղով հատող հետիոտներին: Տուգանքը 3000 դրամ է: Անձնագիր ունենալու դեպքում ոստիկանը տեղում կազմում է տուգանման մասին որոշումը, իսկ եթե քաղաքացու մոտ անձնագիր չկա, նրան բերման են ենթարկում մոտակա ոստիկանության բաժանմունք` անձը պարզելու համար:
Սակայն նկատելի է, որ ճանապարհային ոստիկանները հաճախ մեղմ են վերաբերվում հետիոտներին` բավարարվելով միայն զգուշացումով: Այս թեմայի շուրջ զորւցեցինք ճանապարհային ոստիկանության իրավաբանական բաժանմունքի պետ Արման Չիլինգարյանի հետ:
- Եթե մենք միանգամից սկսենք պատժել բոլորին, ապա ՀՀ բնակչությունը պետք է բաժանվի 2 մասի` մի մասը պատժող լինեն, մյուս մասը պատժվող: Ոստիկանությունը չի կարող այդքան անձնակազմ ունենալ, որ բոլոր հետիոտներին պատժի, մոտավորապես 40 րոպե է անհրաժեշտ տուգանելու համար, եթե անձնագիրը քաղաքացու մոտ չի լինում: Իսկ մեր քաղաքացիները սովորաբար անձնագիր չեն ունենում իրենց մոտ: Արման Չիլինգարյանը նշում է, որ ճանապարհային ոստիկանները հաճախ նախընտրում են բարձրախոսով հայտարարել ճանապարահային կանոնների մասին, քանի որ այդպես տասնյակ քաղաքացիներ կլսեն, քան մեկ անձի տուգանել: - Սակայն լինում են դեպքեր, երբ զգուշացնելուց հետո էլ փորձում են հատել փողոցը անթույլատրելի տեղով, նման հետիոտնին պետք է անպայման տուգանել: Ամենակարեւորն այն է, որ հետիոտն ինքը հասկանա, որ իր կյանքն է վտանգում:
- Բայց հաճախ հետիոտնի համար նախատեսված հոծ գծեր չեն լինում, կամ լուսաֆորը չի աշխատում: Դուք համագործակցո՞ւմ եք Երեւանի քաղաքապետարանի հետ` այս խնդիրները լուծելու համար:
- Անպայման համագործակցում ենք ոչ միայն Երեւանի քաղաքապետարանի, այլեւ բոլոր տեղական ինքնակառավարման մարմինների հետ, քանի որ ճանապարհները տնօրինում են հենց այդ մարմինները, ցանկացած փոփոխություն, լուսանշանի տեղադրում, կատարվում է քաղաքապետի որոշմամբ: Իսկ մենք տալիս ենք մեր մասնագիտական եզրակացությունը:
- Կարծում եմ`հետիոտնի համար նախատեսված հոծ գծերը (զեբրան) բավարար չեն, որոշ փողոցներում ընդհանրապես չկան` հատկապես մարզերում:
- Բավարար լինելն էլ է սուբյեկտիվ հանգամանք եւ գնահատելը միշտ սուբյեկտիվ է: Եթե կարծում եք, որ մեկ օրում պետք է ՀՀ բոլոր փողոցների հարցը կլուծվի, դա հնարավոր չէ: Դա պարբերական գործընթաց է, սկսվում է ինչ-որ տեղից ու չի ավարտվում: Հոծ գծերի ներկը կլիմայական պայմաններից հաճախ ջնջվում է: Իսկ մարզերում փողոցները բարվող վիճակում չեն, փոսեր կան, այդ պատճառով էլ գծանշումներ չեն արվում երբեմն:
Մեկնաբանել