Գնա՞լ, թե՞ չգնալ Թուրքիա. Ջիվան Գասպարյանը դեռ չի որոշել
Համաշխարհային ճանաչում ունեցող դուդուկահար Ջիվան Գասպարյանին հրավիրել են Թուրքիա` խաղաղությանը նվիրված համերգին մասնակցելու: Հայաստանի ժողովրդական արտիստը դեռ չի որոշել` կմեկնի սեպտեմբերին Թուրքիա, թե ոչ: Ժողովրդական երգիչ Արսեն Գրիգորյանը վարպետին խորհուրդ տվեց բոյկոտել այդ համերգը:
«Եթե Ջիվան Գասպարյանի նման հայտնի մարդը բոյկոտի այդ համերգը, մեծ աղմուկ կբարձրանա»,- կարծում է Արսեն Գրիգորյանը: Նա այսօր Ջիվան Գասպարյանի հետ միասին հյուրընկալվել էր «Հայելի» մամուլի ակումբում: Ջիվան Գասպարյանը հիշեց մի դեպք, երբ իրեն տարիներ առաջ հրավիրել էին Թուրքիա. «Այն ժամանակ արտգործնախարար Վարդան Օսկանյանին հարցրի` գնամ, թե ոչ, նա ասաց` անպայման գնա»: Բանախոսներն անդրադարձան հաճախ քննարկվող թեմային` հայկական երգերում թուրքական մուղամին: Արսեն Գրիգորյանը նշեց, որ ոչ միայն թուրքական, այլեւ եվրոպական եւ ամերիկյան մոտիվներով են ստեղծվում ժամանակակից երգերը, դրանք մատուցվում են հանդիսատեսին, հետո էլ ներկայացնում են, թե դա է հիմա պահանջված: Թուրքերն էլ իրենց հերթին փորձում են «թրքացնել» հայկական երգերը: «Նույնիսկ ազատագրական երգն են վերցնում եւ ասում են, թե իրենցն է` առանց բառերը լսելու, որ դա իրենց դեմ է գրվել, ասում են` թուրքական է: Բայց թուրքերն արմատական ոչինչ չունեն, նույնիսկ լեզու չունեն»,- ասում է Արսեն Գրիգորյանը: Ջիվան Գասպարյանը կարծում է, որ մեր ժամանակակից երգարվեստը պետք է որոշակիորեն վերահսկվի մշակույթի նախարարության կողմից:
Մեկնաբանել