Ավազակների դիմակներն ու զենքը նմանեցրել են
Արմավիրի մարզի Արշալույս գյուղի բնակչուհի Սուսաննա Ֆահրադյանը, երեկ հեռուստատեսությամբ տեսնելով ավազակային խմբի ձերբակալման կադրերն ու նրանց որջից առգրավված զենքերն ու դիմակները, անմիջապես վերհիշել է իրենց տան վրա սեպտեմբերի 7-ի լույս 8-ի գիշերը կատարված ավազակային հարձակումը:
Սուսաննա Ֆահրադյանը «Հետքի» հետ զրույցում ասաց, որ ոստիկանությունից դեռ իրենց չեն կանչել, չեն հարցաքննել եւ սպասում են, որ ավազակներին ձերբակալելուց հետո իրենց կկանչեն ոստիկանական բաժանմունք:
«Իրենց տեսքը, դիմակները, ամեն ինչ համապատասխանում է: Ոստիկանությունից մեզ ոչինչ չեն ասել, ասում են՝ նախաքննություն է գնում եւ այլն, անորոշ պատասխաններ են տալիս»,- ասում է տիկին Սուսաննան:
Նա հույս ունի, որ երեկ վնասազերծված ավազակային խմբավորումը հենց իրենց տան վրա հարձակվողները կլինեն, եւ հանցագործությունն այդպիսով կբացահայտվի:
Հիշեցնենք, որ սույն թվականի սեպտեմբերի 7-ի լույս 8-ի գիշերը 7 հոգի դիմակներով եւ զինված ներխուժել էին Վարդան Վարդումյանի առանձնատուն եւ, ծեծի ենթարկելով տան բոլոր անդամներին, իրենց հետ տարել էին ոսկյա զարդեր, 3 մլն դրամ, 1300 դոլար եւ 150 եվրո: Հարուցված է քրեական գործ:
Մեկնաբանություններ (1)
Մեկնաբանել