Կենտրոնական բանկի նախկին նախագահ Բագրատ Ասատրյանի և Ազգային ժողովի ՀՀԿ-ական պատգամավոր Վարդան Այվազյանի այսօրվա բանավեճի թեման տնտեսությունն էր, սակայն բանախոսները որոշեցին նախ անդրադառնալ օրվա տոնին` Անկախության հռչակագրի ընդունման 20-ամյակին:

Բագրատ Ասատրյան-Ես այն սերնդի ներկայացուցիչներից էի, որ այս հռչակագրի ընդունմանը մենք միասին մասնակից ենք եղել, և 20 տարի անց ես ինձ համար և ձեզ համար պետք է եզրակացնեմ, որ սա մի երևույթ է, որը իշխանությունները ամեն կերպ մոռացության են ուզում մատնել:

Այսօր տոնական միջոցառումներ են լինելու: Տոն է, մեծ հաշվով:

Բ.Ա.-Ես կարող եմ մի շատ պարզ փաստով խոսել: 20-ամյակն է, և Գերագույն խորհրդի պատգամավորները նախաձեռնել էին, որ ինչ-որ ձևով պետությունը, իշխանությունը նշեր: Եվ պարզվել է, որ իշխանությունները չունեն ֆինանսական հնարավորություն` մեկ դահլիճ տրամադրելու էս երևույթի համար: «Գերագույն խորհուրդ» պատգամավորական ակումբը նախաձեռնել է, և անհատապես փող են հավաքել (10 թե 15 հազար դրամ), որ էդ նիստը իրականացնեն: Սա, ես կարծում եմ, լավագույն վկայությունն է նրա, թե ինչպես են իշխանությունները վերաբերվում էս երևույթին: Ես Համալսարանի Տնտեսագիտական ֆակուլտետում դասավանդում եմ: Ամեն տարի մտնում եմ լսարան, բնականաբար` առաջինը պատմական ակնարկ, և այլն, այդ թվում նաև` տնտեսական քաղաքականության մասին, և հիշատակում եմ այս փաստաթուղթը` Հռչակագիր Հայաստանի անկախության մասին: Ուսանողների լավագույն դեպքում 10 %-ն է այս փաստաթուղթը կարդացած լինում: Սա իսկապես ցավով եմ ասում, որովհետև սա մի նշանակալից, հատուկ երևույթ էր մեր կյանքում` թե քաղաքական, թե իրավական, թե տնտեսական և այլ իմաստներով: Սա ոչ թե անհատների, ինչ-որ քաղաքական ուժի համար է, սա բոլորի համար է, սա հայոց պետականության համար: Եվ ինչքան մենք կարողանանք արժևորել սա, ես կարծում եմ, մեր սերունդներն էլ կշահեն:

Վարդան Այվազյան-Միանշանակ ես համաիմիտ եմ պրն Ասատրյանի այն տեսակտին, որ Հռչակագիրը մեր հայոց անկախության համար կարևորագույն իրադարձություններից մեկն էր, և բոլորիս շնորհավորում եմ 20-ամյակի առթիվ` չհամաձայնելով միայն այն բանի հետ, որ իշխանությունները ամեն ինչ անում եմ, որ դա չլինի:

Բ.Ա.-Ես փաստերով եմ խոսում, պրն Այվազյան:

Վ.Ա.-Ես էլ փորձեմ փաստերով խոսել. այսօր մենք բոլոր պատգամավորներով, Հանրապետական կուսակցությունով նշում ենք, հավաքվում ենք, համենայն դեպս արդեն բոլորն իրազեկված են:

Բ.Ա.-Ես էլ մեր տանը սեղան եմ գցելու, իմ ընկերները լինելու են: Խոսքը պետական նշելու մասին է, ոչ թե կուսակցական: Կուսակցական միջոցառումներ, այո, լինելու են: ՀՀՇ-ն է ինձ հրավիրել ժամը 5-ին:

Վ.Ա.-Համենայն դեպս, ինձ թվում է, որ հանրապետականը իշխանության մաս կազմում է, երևի նշման տվյալ տարբերակն են ընտրել:

Բ.Ա.-Իշխանություններին բռնեք ծեծեք, որ տենց վատ բան են արել:

Վ.Ա.-Էդ ծեծելն է, որ սենց է ստացվում, էդ ծեծելու ցանկություններն են: