Արա Հարությունյանի նախագահությամբ  տեղի ունեցած ԼՂՀ կառավարության հերթական նիստում գործադիրը հավանություն է տվել «Կյանքին և առողջությանը պատճառած վնասի համար` սահմանված կարգով պատասխանատու ճանաչված իրավաբանական անձի լուծարման կամ սնանկ ճանաչված դեպքում համապատասխան վճարների կապիտալացման և դրանք տուժողին վճարելու  կարգը» սահմանող որոշման նախագծին: Սոցապնախարարությանը դիմած 11 քաղաքացիներ սահմանված կարգով  կստանան համապատասխան վճարները: Սոցիալական ապահովության նախարարությունը հանդես եկավ 1988-1992 թվականներին Ադրբեջանում հանրապետությունից բռնագաղթած  անձանց ապահովագրական ստաժը սահմանող հանձնաժողով ստեղծելու և հանձնաժողովի աշխատակարգը հաստատելու մասին որոշման նախագծով, ինչը արժանացավ կառավարության հավանությանը: Ինչպես տեղեկացնում է ԼՂՀ կառավարության տեղեկատվության և հասարակայնության հետ կապերի վարչությունը, հանձնաժողովի նպատակն է լինելու Ադրբեջանում մինչև 1992 թվականը ձեռք բերած ստաժը հաստատելուն վերաբերող գրավոր դիմում-հայտարարությունները քննարկելը, եթե նրանք ստաժը հիմնավորող փաստաթղթեր չունեն: