ԼՂՀ վարչապետ Արա Հարությունյանն այսօր խորհրդակցություն է հրավիրել  շրջվարչակազմերի ղեկավարների մասնակցությամբ: Քննարկվել են վերջերս ԼՂՀ անվտանգության խորհրդի նիստում բարձրացված` աշնանացանի կազմակերպման և հողօգտագործողների պարտավորությունների հարցերը: Խորհրդակցությունում հայտարարվել է, որ պետության նկատմամբ հողօգտագործողների պարտավորությունները կհետաձգվեն 3 տարի ժամկետով` հավասարաչափ վճարման սկզբունքով: Կառավարությունն այս կերպ ընդառաջում է հողօգտագործողներին` խթանում հողի մշակության աշխատանքներին նոր թափ հաղորդելը:  Այս քայլը լայն հնարավորություն է ընձեռում հատկապես առատ բերք ստացողներին`  միջոցները նորից վերարտադրությանն ուղղելու համար: Տեղեկատվության և հասարակայնության հետ կապերի վարչությունը հայտնում է, որ Կառավարության ղեկավարը հանձնարարել է ժամանակին և պատշաճ մակարդակով ձեռնամուխ լինել աշնանացանին: Առանձին շրջաններում սկսված են հերկի աշխատանքները: Վարչապետը հորդորել է հնարավորինս շատ հերկ կատարել: Ա. Հարությունյանն ավելացրել է նաև, որ հողօգտգործողները վարկերի ձեռքբերման հետ կապված խնդիրներ չեն ունենա: Պետությունը պահանջարկին համապատասխան կտրամադրի վարկային ռեսուրսներ: Խնդիրներ չեն լինի նաև սերմի ձեռքբերման գործում: Ներկրված բարձրակարգ սերմը, սակայն, կտրվի նախևառաջ այն հողօգտագործողին, ով հողը մշակելիս առաջնորդվել է ագրոմիջոցառումներով: