Տեսանյութեր
Լուսանկարներ
Կդառնա՞ Լեւոն Սարգսյանը ԵՊՀ ռեկտոր
Համալսարանական շրջանակներում համառ լուրեր են պտտվում, որ Երեւանի պետական համալսարանի խորհրդի նախագահ Սերժ Սարգսյանը մտադիր է ԵՊՀ ռեկտոր Արամ Սիմոնյանին պաշտոնանկ անել ժամկետից շուտ: Նույն շրջանակները տեղեկություններ ունեն, որ ԵՊՀ ռեկտոր դառնալու մտադրություններ ունի Սերժ Սարգսյանի եղբայրը` ԵՊՀ աստվածաբանության ֆակուլտետի հայ եկեղեցու պատմության ամբիոնի վարիչ Լեւոն Սարգսյանը:
Նշենք, որ Արամ Սիմոնյանի լիազորությունները ռեկտորի պաշտոնում ավարտվում են 2011-ի մայիսի վերջին: Ըստ ԵՊՀ կանոնադրության` համալսարանի խորհուրդն իրավունք ունի ռեկտորին վաղաժամ հետ կանչել: Արամ Սիմոնյանը, սակայն, երեկ «ՀԺ» թղթակցի հետ զրույցում ասել է, թե մտադիր չէ իր լիազորություններից վաղաժամ հրաժարվել: «Առայժմ լիազորություններս վայր դնելու մտադրություն չունեմ»,- ասել է նա:
Ինչ վերաբերում է այն տեղեկություններին, որ ԵՊՀ հաջորդ ռեկտորի ամենահավանական թեկնածուն Լեւոն Սարգսյանն է, Արամ Սիմոնյանն ասել է. «Ես` առանց կոմենտարիաների, որովհետեւ ես ասում եմ. այդ բոլորը խոսակցություններ են, որոնք խանգարում են մեր հիմնական գործին: Կգա ժամանակը, կհայտնվեն թեկնածուները, խորհուրդը թեկնածուների միջից կընտրի ամենաարժանավորին, եւ նա էլ կլինի ռեկտոր»:
Անձամբ Լեւոն Սարգսյանից երեկ այս կապակցությամբ մեկնաբանություն ստանալ չհաջողվեց. նրա աշխատանքային հեռախոսը լռում էր:
Հիշեցնենք, որ Արամ Սիմոնյանը ԵՊՀ ռեկտոր ընտրվեց 2005-ին, ընտրություններն անցան խիստ լարված, մի քանի փուլով: Սիմոնյանն ընտրություններից օրեր առաջ հասցրեց անդամագրվել ՀՀԿ-ին եւ մեծ դժվարությամբ դարձավ ռեկտոր: Նրա հիմնական մրցակիցը ԵՊՀ իրավաբանության ֆակուլտետի դեկան Գագիկ Ղազինյանն էր, որն ընդամենը մեկ ձայնի պատճառով տապալվեց:
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
Մեկնաբանել