Սյունիքի մարզի ընդհանուր իրավասության դատարանը հիմնավորված է համարել «Արդշիինվեստբանկ» ՓԲ ընկերության «Գորիս» մասնաճյուղի կառավարչին հանցավոր ճանապարհով ստացված եկամուտներն օրինականացնելու համար առաջադրված մեղադրանքը եւ դատապարտել 9,5 տարվա ազատազրկման: Ինչպես տեղեկացնում է գլխավոր դատախազության լրատվական ծառայությունը, դատարանը հավաստի է համարել մեղադրող դատախազի  ներկայացրած ապացույցներն առ այն, որ «Արդշինինվեստբանկ» ՓԲ ընկերության «Գորիս» մասնաճյուղի կառավարիչ Հ. Բախշյանը 2006-2009թթ. թվով 95 ֆիզիկական եւ 5 իրավաբանական անձանց անուններով ձեւակերպել է կեղծ վարկեր, որոնց ընդհանուր գումարը կազմում է 918.786.604 դրամ: Վարկերը ձեւակերպվել, ելքագրվել եւ յուրացվել են նրա կողմից փաստացի ղեկավարվող ընկերությունների գործունեության եւ անձնական կարիքների համար, իսկ մի մասն էլ ուղղվել է կեղծ վարկերը եւ դրանց տոկոսները մարելուն, որպիսի գործողություններով Հ.Բախշյանը, թաքցրել, խեղաթյուրել է  նախկինում հափշտակած առանձնապես խոշոր չափերի գումարների՝ 496.863.500, 42 դրամի իրական բնույթը, ծագման աղբյուրները, տեղաշարժը, այսինքն օրինականացրել հանցավոր ճանապարհով ստացած եկամուտները: Սյունիքի մարզի  ընդհանուր իրավասության դատարանի` 10.08.2010թ.  դատավճռով Հ. Բախշյանը հանցավոր է ճանաչվել  ՀՀ քրեական օրենսգրքի  179-րդ հոդվածի 3-րդ մասի 1-ին կետով եւ  190-րդ հոդվածի 3-րդ մասի 1-ին կետով եւ դատապարտվել 9  տարի 6 ամսվա  ազատազրկման`  հանցավոր ճանապարհով  ստացված գուքի` 496  863 500 դրամի բռնագրավմամբ` հօգուտ պետբյուջեի: Բանկի մյուս 6 աշխատակիցները հանցավոր են ճանաչվել ՀՀ քրեական օրենսգրքի  214-րդ հոդվածի 2-րդ մասով: Անդրադառնալով «Արդշինինվեսբանկին» պատճառված վնասի վերականգնմանը՝ դատարանը պարզել է, որ 918.786.604 ՀՀ դրամից մի մասը մարվել է Հովիկ Բախշյանի կողմից, կեղծ վարկերը սպասարկելու եղանակով, իսկ 351.643.500 ՀՀ դրամն էլ հատուցվել է «Ռասկո» ապահովագրական ՍՊԸ-ի կողմից, արդյունքում չվերականգնված մասը կազմել է 340.216.012 ՀՀ դրամ, ինչը նկատի ունենալով դատարանը  վճռել է ամբաստանյալներից համապարտությամբ հօգուտ «Արդշինինվեսբանկ» ՓԲԸ-ի բռնագանձել ընդհանուր առմամբ 340.216.012 ՀՀ դրամ: