Պոլսո Հայոց պատրիարքարանի հագեւոր խորհրդի նախագահ, արքեպիսկոպոս Արամ Աթեշյանը տեղեկացրել է, որ Վանի Աղթամար կղզու Սուրբ Խաչ եկեղեցում սեպտեմբերի 19-ին մատուցվելիք պատարագը տեղի կունենա եկեղեցու գմբեթին խաչը չտեղադրված: Արքեպիսկոպոսն ասել է, որ 200 կգ կշռող խաչը հնարավոր չէ մինչեւ սեպտեմբերի 19-ը տեղադրել եկեղեցու վրա`տեխնիկական պատճառներով: Ըստ նրա` դրա համար անհրաժեշտ է վերամբարձ կռունկ տեղափոխել Աղթամար կղզի, ինչը, թուրքական իրավասուների պնդմամբ, կարվի սեպտեմբերի 19-ից հետո: Մայր Աթոռ Սուրբ Էջմիածինը դեռեւս դիրքորոշում չի հայտնել Աղթամարի Սուրբ Խաչ եկեղեցու գմբեթին խաչ չտեղադրելու փաստի առնչությամբ: Հիշեցնենք, որ սեպտեմբերի 19-ին տեղի ունենալիք պատարագին Մայր Աթոռ Սուրբ Էջմիածինը մասնակցելու է ի դեմս միաբաններ Մարկոս եպիսկոպոս Հովհաննիսյանի եւ Կոմիտաս վարդապետ Հովնանյանի: Մինչդեռ Մեծի Տանն Կիլիկիո կաթողիկոսությունը չի մասնակցելու Աղթամարի Սուրբ Խաչ եկեղեցու պաշտոնական բացման հանդիսությանը` համարելով, որ դրանով «հստակ կեցվածք է որդեգրում Թուրքիայի ուրացման ու ժխտումի հետեւողական քաղաքականության, հայկական կյանքում շփոթ ստեղծելու եւ միջազգային համայնքին իբրեւ մարդու իրավունքների պաշտպան ներկայանալու Թուրքիայի փորձերի դեմ»: