Հայաստանի «Սպեղանի» երիտասարդական երգչախումբն օգոստոսին Սանկտ Պետերբուրգում կայացած Յուրի Ֆալիկի անվ. միջազգային խմբերգային հեղինակավոր մրցույթ-փառատոնում տոնել է փայլուն հաղթանակներ: Միջազգային խմբերգային մրցույթ-փառատոնին մասնակցում էր շուրջ 23 երկրից ժամանած ավելի քան 40 երգչախումբ, որոնց շարքում «Սպեղանին» արժանացել է հետևյալ մրցանակներին. «Հոգևոր երաժշտություն» և «Ազգային երաժշտություն» անվանակարգերում երգչախումբն արժանացել է առաջին մրցանակի: «Ժամանակակից երաժշտություն» անվանակարգում արժանացել է ժյուրիի սահմանած հատուկ մրցանակի` «Մրցույթի պարտադիր ստեղծագործության լավագույն կատարման համար»: Մրցույթ-փառատոնի շրջանակում «Սպեղանի» երգչախմբի բարձրարվեստ, ինքնատիպ մեկնաբանմամբ Սանկտ Պետերբուրգի լավագույն բեմերից հնչել են հայ և ռուս կոմպոզիտորների հանրահայտ խմբերգերը` կենդանի, թատերականացված կատարումներով: Սանկտ Պետերբուրգի միջազգային խմբերգային հեղինակավոր մրցույթ-փառատոնում «Սպեղանու» մասնակցությանն աջակցել է ՀՀ մշակույթի նախարարությունը: «Սպեղանի» երգչախումբը հիմնադրվել է 1996 թ. երաժշտագետ և մանկավարժ Սարինա Ավթանդիլյանի ջանքերով, ով նաև երգչախմբի գեղարվեստական ղեկավարն ու խմբավարն է: Երգչախումբը ստեղծվել է ի հիշատակ Արցախի ազատագրական պատերազմի նահատակների: Երգչախմբի երգացանկում ընդգրկված են տարբեր դարաշրջանների և ազգերի խմբերգային ստեղծագործությունների ընտրանի: «Սպեղանիի» ամենամեծ նվաճումը Կոմիտասի մշակմամբ Սուրբ Պատարագի ձայնագրումն է՝ քահանայի և սարկավագի երգամասերով: Այն արժանացել է Ն.Ս.Օ.Տ.Տ. Ամենայն Հայոց Կաթողիկոս Գարեգին Բ-ի օրհնությանը: ՀՀ Մշակույթի նախարարության կայքը հայտնում է, որ Կանադա-Հայաստան խորհրդարանական խմբի պատվիրակության այցի առիթով ՀՀ-ում Կանադայի հյուպատոսությունը սեպտեմբերի 7-ին Կոմիտասի անվան կամերային երաժշտության տանը կազմակերպում է խմբերգային երաժշտության երեկո` «Սպեղանի» երիտասարդական երգչախմբի մասնակցությամբ: