Այսօր «Ժառանգություն» խմբակցության պատգամավոր Անահիտ Բախշյանը նամակներ է ուղարկել Երեւանի քաղաքապետին եւ Քաղաքաշինության նախարարին Երեւանի Վաղարշ Վաղարշյանի անվան թիվ 80 դպրոցի հարեւանությամբ վերջերս կառուցված բենզալցակայանի վերաբերյալ: Ստորեւ ներկայացնում ենք վերոնշյալ նամակների բովանդակությունը: «Սեպտեմբերի 3-ի «Առավոտ» օրաթերթը  հրապարակել էր  Կիլիկիա թաղամասի բնակիչների ահազանգը` Երեւանի Վաղարշ Վաղարշյանի անվան թիվ 80 դպրոցի հարեւանությամբ վերջերս կառուցված բենզալցակայանի մասին: Բնակիչներն ահազանգել են բենզալցակայանի  վտանգավոր մոտիկության մասին: Անձամբ տեղում լինելով` համոզվել եմ փաստի մասին: Քաղաքաշինության նախարարության համապատասխան վերահսկողության բաժնի պետ Նորիկ Մնոյանը խոստացել է գնալ տարածք, ստուգել, թե քաղաքաշինության նորմերի խախտումներ եղե՞լ են, թե՞ ոչ: «Ազգային Ժողովի կանոնակարգ» ՀՀ օրենքի 7-րդ հոդվածի համաձայն` 10-օրյա ժամկետում խնդրում եմ տրամադրել տեղեկատվություն այն մասին, թե 1.    վերոնշյալ կառույցի շինարարության մասին թույլտվություն տրվե՞լ է եւ ե±րբ 2.    քաղաքաշինության նորմերի պահպանման մասին տեղեկանք տրվե՞լ է եւ ու՞մ կողմից»: Ս.թ. օգոստոսի 25-ին «Ժամանակ» թերթում «Արմեն Աշրաֆյանը «մխտռո՞ւմ է» կոռուպցիայի դեմ պայքարը» Էլմիրա Մարտիրոսյանի հեղինակած հոդվածում հրապարակված տեղեկությունների առնչությամբ Անահիտ Բախշյանը ՀՀ գլխավոր դատախազին ուղղել է հետեւյալ հարցերը. «Խնդրում եմ «Ազգային ժողովի կանոնակարգ» ՀՀ օրենքի 7-րդ հոդվածով նախատեսված 10-օրյա ժամկետում տրամադրել տեղեկություն այն մասին, թե 1. արդյոք ստուգվե՞լ է հրապարակված նյութի բովանդակության իսկությունը, 2. հարուցվե՞լ է քրեական գործ, թե՞ ոչ, 3. եթե հարուցվել է, ապա ի՞նչ փուլում է այն գտնվում»: