Ֆրանս Տելեկոմ խմբի անդամ «Օրանժ Արմենիա» ընկերութան (ապրանքանիշը` Orange) մուտքին Հայաստանում շատերն էին սպասում` հույս ունենալով, որ ընկերությունը կմատուցի «ֆրանսիական որակի» շարժական հեռախոսակապ եւ ինտերնետ ծառայություններ: Սակայն մի քանի ամիս անց հիասթափությունն անխուսափելի էր, բաժանորդներն այդպես էլ եվրոպական չափանիշներին համապատասխան ծառայություններ չստացան:

«Orange»-ը Հայաստանում ծառայություններ է մատուցում 2009 թ. նոյեմբերի 5-ից: Ընկերության ներկայացմամբ` «Orange»-ի 3G+ ծածկույթն այսօր ամենաընդարձակն է Հայաստանում եւ ծածկում է բնակչության ավելի քան 85%-ը: «Օրանժ Արմենիա»-ի նպատակն է` դառնալ Հայաստանի հեռահաղորդակցության շուկայում հզոր դերակատար` մատուցվող ծառայությունների բարձր որակի, նորարար առաջարկների, ճկուն գնային քաղաքականության եւ վաճառքի ու սպասարկման լայն ցանցի շնորհիվ: Ընկերությունն իր բաժանորդներին է առաջարկում նորագույն տեխնոլոգիաների վրա հիմնված լավագույն ծառայություններ, ինչպես նաեւ աշխարհի հինգ մայրցամաքներում իր ծավալած գործունեության մասնագիտական փորձն ու գիտելիքները»,-գրված է ընկերության ինտերնետային կայքում: Թե «բարձր որակ» եւ «նորարար առաջարկներ» ասելով ընկերությունն ինչ նկատի ունի, այդպես էլ հստակ չէ, քանի որ ինչպես Երեւանում, այնպես էլ մարզերում մասնավորապես ինտերնետ ծառայության որակից շատերն են դժգոհում:

«Orange»-ի վաճառքի խանութներում մեկ տարվա բաժանորդագրությամբ ինտերնետ ծառայությունների ստացման համար բաժանորդները «Ինտերնետ Հիմա 7.2 3G+» մոդեմը ձեռք են բերում 1 դրամով: Անշուշտ, սա շատ գրավիչ առաջարկ է, մանավանդ, երբ օրը մի քանի անգամ տարբեր հեռուստաընկերությունների եթերում պտտվում է ընկերության գովազդային հոլովակը գերարագ ինտերնետի մասին: Հատկապես մարզերի բնակիչները, որոնք այլընտրանք գրեթե չունեն, գայթակղվում են գովազդով եւ ընկնում «Orange»-ի սարդոստայնը, քանի որ այն բաժանորդները, ովքեր «Ինտերնետ Հիմա 7.2 3G+» մոդեմը ձեռք կբերեն առանց մեկ տարվա պայմանագրի, մոդեմը ստիպված կլինեն գնել 24 000 դրամով (սկզբում 35 000 դրամ էր):

Մեկ տարվա պայմանագիր կնքած բաժանորդներին «Orange»-ը տալիս է 15-օրյա ժամկետ մոդեմը վերադարձնելու եւ պայմանագիրը լուծելու համար: Այդ ժամկետը լրանալուց հետո, եթե բաժանորդը դժգոհ է կապի որակից, ապա պայմանագիրը լուծելու համար ստիպված է ընկերությանը վճարել մոդեմի ամբողջ արժեքը` 24 000 դրամ եւ տուգանք` 1000 դրամ:

Այս պահին շատերն են հիասթափվել «Orange»-ից, սակայն մոդեմը վերադարձնելու համար ստիպված են լինելու բավականին կլորիկ գումար վճարել ընկերությանը, այդ պատճառով ստիպված համակերպվում են «Orange»-ի խաղի կանոններին: Նման մի ծուղակում հայտնվեցի նաեւ ես` դառնալով «Orange»-ի  ինտերնետ օգտագործող: Սկզբնական ժամանակահատվածում, համեմատած մյուս 2 օպերատորների առաջարկած ինտերնետի որակի հետ, կապն, իրոք, գերարագ էր, սակայն դա տեւեց ընդամենը 20 օր, որից հետո որակը կտրուկ ընկավ: Նույն դժգոհությամբ բազմաթիվ քաղաքացիներ են դիմել խմբագրություն, նրանց գերակշիռ մասը մարզերից է: Սեպտեմբերի 4-ից մինչ օրս «գերարագ» ինտերնետից չեն կարողանում օգտվել Արմավիրի մարզի Աղավնատուն եւ հարակից գյուղերի բնակիչները: Սովորական mail.ru կայքէջը նրանք կարողանում են բացել 10-15 րոպեի ընթացքում, չի բացառվում, որ էլեկտրոնային նամակը դեռ չուղարկված` համակարգչի մոնիտորին բացվի մի պատուհան` «Ծառայություն չկա» աչքալուսանքով:

Այդ դեպքում օգտագործողը ստիպված մի քանի րոպե որսում է պատուհանի գրությունները, որպեսզի 0-ից բարձր որակական արդյունք նկատելու դեպքում անմիջապես բացի ցանկացած կայք, քանի դեռ էկրանին չի հայտնվել հերթական գրությունը ծառայություն չլինելու մասին: Անձամբ ես վերջին 4-5 օրերի ընթացքում 50 անգամ զանգահարել եմ «Orange»-ի սպասարկման կենտրոն, որպեսզի օպերատորներից տեղեկանամ, թե ինչու ընկերությունը չի կատարում պայմանագրով ստանձնած պարտավորությունները:

Ոչ մի աշխատակից այդպես էլ ազնիվ չգտնվեց ասելու, որ խնդիրն իրենց թույլ կապն է: Ասելով, թե ցանցում խնդիրներ չունեն, նրանք մեղքը գցում էին նախ համակարգչի, հետո` վիրուսների ու նման բաների վրա: Սեպտեմբերի 4-ին իմ անունից գրանցեցին դիմում-հայտ, որը պետք է ուղարկվեր տեխնիկական բաժին` խնդիրը պարզելու համար: Սակայն մի մղձավանջ էլ սկսվում է տեխնիկական բաժնի պատասխանին սպասելիս, որովհետեւ պատասխանը ստացվում է 3-4 աշխատանքային օրվա ընթացքում, իսկ եթե մի բաժանորդի կապը «համարձակվի» խափանվել հանգստյան օրերին, ապա բաժանորդը ընկերությունից պարզաբանում կստանա 5-6 օր հետո: 24.06.2010 թ. ասուլիսի ժամանակ «Օրանժ Արմենիա»-ի գլխավոր տնօրեն Բրունո Դյութուան հայտարարեց. «Մենք մի կարեւոր բան ենք արել. առաջնակարգ ծառայությունները հասանելի ենք դարձրել բոլորին: Մենք շարունակում ենք ամեն օր աշխատել ծառայությունների որակը բարելավելու վրա` ապահովելու համար մեր ծառայությունների որակի համապատասխանությունը եվրոպական օպերատորի չափանիշներին, ամենամրցունակ սակագներով»:

Մի՞թե Եվրոպայում բաժանորդներից գումար են գանձում չմատուցված ծառայության համար, մի՞թե Եվրոպայում ընկերությունը կարող է ծառայություններ մատուցել` մոլորության մեջ գցելով իր բաժանորդներին: Դժվար թե եվրոպական որեւէ երկրում  Dial-up ցածր որակի ինտերնետը գերարագի անվան տակ ընկերությունները վաճառեն ամսական 6-20 հազար դրամով, ինչպես «Orange»-ն է անում: Խմբագրություն դիմած «Orange»-ի բաժանորդները պնդում են, որ ինտերնետ կապի որակը կտրուկ ընկել է, երբ օգոստոսի 28-ից շուկայում հայտնվեց ամենաարագ «Ինտերնետ Հիմա 14.4 3G+» մոդեմը, որի արժեքը մեկ տարով բաժանորդագրվելու դեպքում 15 000 դրամ է, իսկ առանց պայմանագրի` 37 000: Բաժանորդները համոզված են, որ ընկերությունը դիտավորյալ է կապի որակը գցում, որպեսզի վաճառվեն նոր մոդեմները:

«Օրանժ Արմենիա»-ի հանրային կապերի պատասխանատու Լիլիթ Մարտիրոսյանը «Հետքին» պարզաբանեց, որ մասնավորապես Աղավնատուն գյուղում ցածր որակի ինտերնետ կապը որեւէ առնչություն չունի շուկայում հայտնված նոր մոդեմների հետ: «Այդ տարածքում վիճակն այնքանով է լավ, որ մի 2 ամսվա ընթացքում բավականին շատ բաժանորդներ ենք ունեցել, ու խնդիրներն առաջանում են գերծանրաբեռնվածության պատճառով: 10  օրվա ընթացքում կայանը հզորացվելու է, եւ կվերականգնվի նախկին արագությունը»,- ասաց Լ. Մարտիրոսյանը:

Անդրադառնալով այն հարցին, թե ինչու են տեխնիկական բաժնից կապի որակից դժգոհ բաժանորդներին այդքան ուշ պարզաբանումներ տալիս` նա նշեց, որ այդ ժամանակը պետք է, որպեսզի օպերատորը գտնի տեխնիկական աշխատակցին, վերջինս էլ որոշակի աշխատանքներ է տանում, որպեսզի գտնի խնդրի պատճառը, որից հետո էլ լուծումներ է առաջարկում: «Դա 5 րոպեում հնարավոր չի անել: Իսկապես տեղյակ ենք, որ այդ գյուղի տարածքում ցանցը որոշակի ծանրաբեռնվածություն ունի, ինչը մեր հաջողությունների մասին է խոսում»,- ավելացրեց լրատվության պատասխանատուն: Որպես բաժանորդ Լ. Մարտիրոսյանից հետաքրքրվեցի, թե ընկերությունն ինչպես է ինձ փոխհատուցելու պայմանագրով ստանձնած պարտականությունները չկատարելու համար: Հանրային կապերի պատասխանատուն ասաց, որ ցանցային տատանումները դեռեւս պայմանագրի խախտում չեն:

«Եթե որոշակի ժամանակահատվածում մեր մասնագետները տեսնեն, որ մեր պատճառով չեք կարողացել օգտվել ինտերնետից, ձեզ համար ինչ-որ բան կմտածեն, որ ձեզ այդքան դժբախտ չզգաք: Ես չեմ կարող ասել, թե կոնկրետ ինչ կմտածեն ձեզ համար, բայց փոխհատուցման հստակ մեխանիզմներ ունենք, եւ դուք առաջինը չեք»: Ներողություն խնդրելու եւ հստակ մեխանիզմներ նշելու փոխարեն  ընկերության ներկայացուցիչը «դժբախտիս» հույս է տալիս, որ «ինչ-որ բան կմտածեն» դժբախտությունս փարատելու համար: Լիլիթ Մարտիրոսյանն ասաց, որ ընկերության թերացումը ապացուցվելու դեպքում փոխհատուցում կտրվի նաեւ այլ բաժանորդների: Մնում է շնորհակալություն հայտնել «Orange»-ին, որ այդքան բարի է գտնվում եւ իր բաժանորդների հետ կիսում է նրանց «դժբախտությունը»: