Հայաստանի սոցիալական ներդրումների հիմնադրամի (ՀՍՆՀ) տնօրեն Աշոտ Կիրակոսյանը, Գեղարքունիքի մարզպետ Նվեր Պողոսյանը եւ «ԳեոՊրոՄայնինգ» ընկերությունների խմբի նախագահ Ռոման Խուդոլին ստորագրել են Գեղարքունիքի  մարզի սոցիալական զարգացման ռազմավարական համագործակցության համաձայնագիր: Դրա շրջանակներում որպես առաջին քայլ նախատեսվում է իրականացնել Վարդենիս քաղաքի մշակույթի պալատի հիմնանորոգման ծրագիրը: Ծրագրի արժեքը 320 մլն դրամ է, որից 130 մլն դրամը հատկացնելու է ՀՍՆՀ-ն` Համաշխարհային բանկի տրամադրած վարկային միջոցներից: Մնացածը կներդնեն «ԳեոՊրոՄայնինգ» ընկերությունների խումբը` 108 մլն դրամ եւ ՀՀ կառավառությունը` 82 մլն դրամ: Ինչպես հայտնում են ՀՍՆՀ հանրայաին կապերի բաժնից, Գեղարքունիքի մարզում ՀՍՆՀ-ն արդեն իրականացրել է 15 ծրագիր. կառուցվել եւ վերանորոգվել են մշակույթի տներ, համայնքի կենտրոններ, առողջապահական հիմնարկներ, դպրոցներ: Ութ ծրագիր ընթացքի մեջ է: Այս ծրագրերի իրականացման համար Հայաստանի սոցիալական ներդրումների հիմնադրամը հատկացրել է մոտ 1 մլրդ 250 մլն դրամ: