Այսօր Մարդու իրավունքների եվրոպական դատարանը սկսում է Շահումյանից բռնագաղթած հայ փախստականների և Լաչինի շրջանի նախկին բնակիչների («Չիրիգովի և մյուսների»)` գույքի և ունեցվածքի փախհատուցման պահանջով հայցերի լսումների, համապատասխանաբար` ընդդեմ Ադրբեջանի և Հայաստանի: Այս կապակցությամբ Լարիսա Ալավերդյանը «Հայոց աշխարհի» թղթակցին ասաց. «Նախ, մենք և ադրբեջանցիները բոլորովին ասիմետրիկ վիճակում ենք: Եթե նախկին հայաստանաբնակ ադրբեջանցիներն ստացել են փախհատուցում` առնվազն երկրաշարժի հետևանքով կորցրած գույքի փախհատուցման տեսքով, ապա Ադրբեջանից բռնությամբ տեղահանված հայերը ընդհանրապես ոչինչ չեն ստացել: Շահեկա՞ն է սա մեզ համար, թե՞ ոչ: Իհարկե շահեկան է, որովհետև մանրակրկիտ հաշվարկներով միանշանակ հիմնավորված է, որ հայերը Ադրբեջանում թողել են շատ ավելի մեծ գույքային, նյութական, այդ թվում` ֆինանսական արժեքներ, քան Ադրբեջանը Հայաստանում»: