Երևանի Մոնթե Մելքոնյանի անվ. թ.11 դպրոցում տնօրեն Ռուզան Ազիզյանի կողմից աշխատողների իրավազրկման փաստի վերաբերյալ ս.թ. հուլիսի 8-ին մամլո հաղորդագրություն էր տրվել նույն դպրոցի ուսուցիչներ Լիլիա Մարգարյանի և Մարգարիտ Իսպիրյանի կողմից: Սահմանադրության և օրենքի կոպիտ խախտումներ պարունակող «Աշխատողի վարքագծի պարտադիր կանոններ» ներքին իրավական ակտի ընդունմամբ տնօրենը կարողացել էր կամազրկել գրեթե ողջ կոլեկտիվը և արհեստակցական կազմակերպությունը, իսկ սեփական կարծիք ունեցողներին` հերթով ազատել աշխատանքից. Գոհար Բարսեղյան, Նաիրա Եղիազարյան, Լիանա Սիմոնյան այժմ նաև` Լիլիա Մարգարյան և Մարգարիտ Իսպիրյան: Վերջին երեք ուսուցիչների դեմ Ազիզյանը նաև հայց է ներկացրել Մալաթիա-Սեբաստիա ԸԻ դատարան` պատիվը, արժանապատվությունը արատավորող տեղեկություններ տարածելու փաստով հերքում ներկայացնելու պահանջով (գործը գտնվում է դատավոր Իսկուհի Վարդանյանի վարույթում), վկայակոչելով «Առավոտ»թերթի 11.12.2009թ. համարում տպագրված «Մոնթե Մելքոնյանի անվան դպրոցի մութ պատմությունները» հոդվածը: Դրան ի պատասխան, ուսուցիչները հակընդդեմ հայց են ներկայացրել, որը պարունակում է նաև «Աշխատողի վարքագծի պարտադիր կանոններ» ներքին իրավական ակտն անվավեր ճանաչելու  պահանջ: Հակընդդեմ հայցին կից ուսուցիչները ներկայացրել են անհերքելի ապացույցներ (մանկխորհի նիստի և սեփական երկխոսությունների ձայնագրություններ տնօրենի հետ), տնօրենի կողմից ուսուցիչների իրավունքների կոպիտ ոտնահարումների վերաբերյալ: Այսպես` ա/ Ռ. Ազիզյանը դիմելով Լ. Մարգարյանին սպառնում է անցնել ֆիզիկական հաշվեհարդարի. «Հիմի ասեմ, գլուխդ կջարդեն, բոլորը կանգնած են, ասում են մի հատ էլ խոսի` գլուխը ջարդելու ենք»… Այնուհետև աշխատանքից ազատելու սպառնալիք. «Ես քեզ այնպես եմ ազատելու, որ Եվրոխորհուրդ էլ դիմես, ասեն սխալ եք»… Այնուհետև` «Եթե դու գտնում ես, որ ես Նաիրա Եղիազարյանին անհիմն եմ ազատել (աշխատանքից),  ուրեմն դու ստանում ես նկատողություն…  խիստ նկատողություն»: Ի դեպ, ս.թ. սեպտեմբերի 10-ին Վերաքննիչ քաղաքացիական դատարանը` նախագահությամբ Գ. Մատինյանի, մերժեց դպրոց-ՊՈԱԿ-ի ներկայացուցչի վերաքննիչ բողոքը, օրինական ուժի մեջ թողնելով Մալաթիա-Սեբաստիա ԸԻ առաջին ատյանի դատարանի դատավոր Կարեն Ֆարխոյանի  կայացրած վճիռը` Նաիրա Եղիազարյանի աշխատանքից ազատման 066 հրամանն անվավեր ճանաչելու, աշխատանքում վերականգնելու և հարկադիր պարապուրդի ժամանակահատվածի գումարը բռնագանձելու պահանջի մասին (ընդամենը… 21 ամսվա` այս պահի դրությամբ): բ/Գործավարը տնօրենի ցուցումով չի տրամադրում հաշվառման թերթիկը (տաբելը) ժամանակին աշխատանքի ներկայացած Լ. Մարգարյանին ստորագրելու, ապօրինաբար պահանջելով մի դեպքում` ներկայացնել աշխատանքային պայմանագրի Լ. Մարգարյանին պատկանող օրինակը, մյուս դեպքում` մեկ այլ փաստաթուղթ, իսկ վերջում էլ չի խորշում ստելուց, ասելով. «Էն ժամանակ դուք չստորագրեցիք, հիմա արդեն ուշ է»: գ/ Տնօրենը մեթոդապես կշտամբում է իր ստացած աշխատավարձի վերահաշվարկը պահանջող աշխատողին, ամփոփելով. «Հիմա  ինչ ես էկել`  հացիս վայիս ես ըլնում»… իսկ հետո, չկարողանալով քիչ թե շատ խելքը գլխին բացատրություն գտնել, հանկարծ «պայթում է» և զարհուրելի ճիչեր արձակում, ինչից սարսափած` աշխատողը իրեն մի կերպ դուրս է գցում: դ/ Տնօրենը մանկխորհի նիստում ընթերցում է արհկոմի նախագահի «գլուխգործոց» նամակներից մեկը,  որն ավարտվում է այսպիսի մաժորային տոնայնությամբ. «Խնդրում եմ  և պահանջում.  ազատել աշխատանքից Լ. Մարգարյանին և Մ. Իսպիրյանին, քանի որ նրանք անուղղելի են, եթե նախկինում մեզ թափահարում էին տեսուչով և իրավաբանով, հիմա էլ մեզ թափահարում  են իրենց դատարաններով»: Ճիշտ է, ցուցաբերելով «մեծահոգություն», տնօրենը այդպես էլ չհարգեց արհկոմի պաղատանքները, այլ միայն կրթական բարեփոխումների բեռից  ճնշված` «ճարահատյալ» ազատեց նրանց  աշխատանքից կրճատման` միանգամայն անմեղ հիմքով, աշխատելով պահպանել ջրից չոր դուրս գալու համար անհրաժեշտ բոլոր ձևականությունները: Տնօրենի այդ «մեծահոգությունը» չգնահատող ուսուցիչները, հնարավոր է` նաև միամտաբար հավատալով արհկոմի նախագահի այն պնդմանը, թե տեսուչը, իրավաբանը և հատկապես դատարանները այլևս իրենցն են , ազատման հրամանի օրինականությունը ևս բողոքարկեցին, նույն` Մալաթիա- Սեբաստիա ԸԻ դատարանում:  Գործը գտնվում է  դատավոր Լիլիթ  Կատվալյանի վարույթում: Ի գիտություն Ռ. Ազիզյանի պետք է ասել, որ նա գործ ունի ոչ թե մի խումբ նեղացած կանանց, այլ իրենց սահմանադրական իրավունքները գիտակցած քաղաքացիների հետ, որոնք պատրաստ են բոլոր օրինական միջոցներով մինչև վերջ պայքարելու արդարության հաղթանակի և օրինականության վերականգնման համար: Նույն դպրոցի նախկին (դեռևս) ուսուցիչներ` Լիլիա Մարգարյան, Մարգարիտ Իսպիրյան