«Հայաստան» համահայկական հիմնադրամը տեղեկացնում է, որ սեպտեմբերի 15-ին պաշտոնապես բացվել է Լոռու մարզի Արծնի համայնքի դպրոցը, որը  հիմնանորոգվել է Հնդկաստանի կառավարության ֆինանսավորմամբ: Շուրջ 80 միլիոն ՀՀ դրամի չափով դրամաշնորհը Հնդկաստանի կառավարությունը «Հայաստան»  հիմնադրամին տրամադրել է բարեկամ երկրներին ցուցաբերվող «Աջակցության ու զարգացման ծրագրի» շրջանակներում: Հիմնանորոգվել է 1962 թվականին կառուցված երկհարկանի դպրոցի աջակողմյան մասնաշենքը, որը լիարժեք կսպասարկի համայնքի դպրոցականներին:  Վերահատակագծված մասնաշենքում փոխվել են տանիքը, մանրահատակը, տեղադրվել են նոր դռներ ու լուսամուտներ, կառուցվել է կաթսայատուն: Համայնքում այլ փոփոխոթյուններ էլ են սպասվում: Օրերս շահագործման կհանձնվի Հիմնադրամի կառուցած համայնքային կենտրոնը, ընթացքում է խմելու ջրի ծրագիրը: Համայնքի ղեկավար Խենկո Խաչանեսյանը ցավով նկատեց, որ նախկինում համայնքի բնակչությունը շատ ավելի մեծ էր, եւ այսօրվա 49 աշակերտի փոխարեն գյուղի դպրոցում սովորում էր շուրջ 300 -ը: Մեկ այլ ծրագրով ներկայումս գյուղում ջուր է անցկացվում, եւ գյուղացիները հույս ունեն, որ ջուր կրելը գյուղի մերձակայքում գտվող տարբեր աղբյուրներից շուտով հիշողություն կդառնա: Գյուղում բազմաթիվ խնդիրներ կան, որոնք այսօր հանգեցրել են գյուղի երիտասարդների եւ հիմնական աշխատուժի արտագաղթին: Այդ խնդիրների շարքում գյուղապետն առաջնահերթ համարեց ջրի, գազի, մանկապարտեզի, ժամանցի կազմակերպման ձեւերի բացակայությունը: