Սեպտեմբերի 17-ի առավոտյան, ժամը մոտ 9.30-ից ոստիկանության Իջեւանի բաժնի աշխատակիցները` բաժնի պետ Անդրանիկ Ազիբեկյանի գլխավորությամբ տարածքի մաքրման, բարեկարգման եւ ծառատունկի աշխատանքներ են  սկսել Իջեւան քաղաքի կենցաղի տան հարակից տարածքում: Այդտեղ նախկինում ապօրինաբար առեւտուր էին անում գյուղմթերք վաճառողները: Ծառատունկի սկզբից մի ժամ անց  ժամանել են ռազմական ոստիկանության աշխատակիցները: Ռազմական ոստիկանության  կապիտան, Տավուշի մարզի ռազմական ավտոտեսչության պետ Գագիկ Թանանյանը  բանակցություններ է  վարել Իջեւանի ոստիկանապետի  հետ : Հետո վերջինիս զանգահարել է  Տավուշի մարզի ռազմական ոստիկանության պետ, գնդապետ Սուրիկ Ամիրյանը` հայտնելով, որ  2007թ. շուրջ 100 քառակուսի մետր այդ տարածքը սեփականաշնորհվել է  իր ազգականին` Էդգար Ամիրյանին: Նշենք, որ այդ տարածքի վաճառքը կատարվել է   շուկայականից բազում անգամ էժան գներով: Ի վերջո, ոստիկանները տարածքում  երկու ծառ տնկելով` դադարեցրել են իրենց  գործը: Հավելենք, որ կենցաղի տան հարակից տարածքը  նախկինում կանաչապատ գոտի է եղել,եւ ՀՀ  հողային օրենսգրքի   60 հոդվածի համաձայն  այն  չէր կարող սեփականաշնորհվել: Այս կապակցությամբ Հայաստանի հատուկ քննչական ծառայությունը 2009թ. հուլիսից  քննություն է կատարում, սակայն դրա ավարտը չի երեւում: