Սեպտեմբերի 20-ին և 21-ին ղարաբաղա-ադրբեջանական զորքերի շփման գոտու մի շարք հատվածներում արձանագրվել է հրադադարի ռեժիմի խախտման շուրջ 85 դեպք: Սակայն ԼՂՀ ՊԲ տարածած տեղեկատվության մեջ ոչինչ չկա ասված զոհերի մասին: Մինչդեռ շաբաթ օրը Շուշիում կայացել է երկու երիտասարդ զինծառայողների հուղարկավորության արարողությունը: Տղաների կյանքը խլել է հակառակորդի «սնայպերը»: Նրանցից մեկը վիրավորվել է, իսկ մյուսը, տեսնելով, որ ընկերոջ կյանքին վտանգ է սպառնում, նետվել է առաջ` վերջինիս փրկելու: Սակայն նորից կրակոցներ են եղել, և երկուսն էլ սպանվել են: