Տեսանյութեր
Լուսանկարներ
«Սարդարապատը» քննարկել է երկրի սոցիալ-տնտեսական վիճակը
«Սարդարապատ» շարժման նախաձեռնող խումբը տեղեկացնում է, որ սեպտեմբերի 22-ին Գրողների միության տան դահլիճում կազմակերպվել էր հավաք «Հայաստանի Հանրապետության սոցիալ–տնտեսական իրավիճակի գնահատումը և ելքերի առաջադրումը» թեմայով:
Հավաքին մասնակցում էին հայտնի ազգային, հասարակական գործիչներ, գիտնականներ, փորձագետներ, շարժման համակիրներ: Շարժման նախաձեռնող խմբի անդամներն ու համախոհները հանդես եկան ելույթներով և զեկույցներով:
«Հայաստանի ազատագրության հայ գաղտնի բանակի» նախկին անդամ Ալեք Յենիգոմշյանը «ժողովրդագրական համաղետ» անվանեց Հայաստանի իշխանությունների քաղաքական և տնտեսական ապիկարության պատճառով աճող արտագաղթը, որի հետեւանքով երկրի ազգաբնակչությունը վերջին 20 տարում կրճատվել է մեկ երրորդով և շեշտակիորեն շարունակում է նվազել:
Տնտեսագետ, ազատամարտիկ «Սարդարապատ» շարժման նախաձեռմող խմբի անդամ Հայկ Բալանյանը բացառեց իշխող ավազակախմբի հետ որեւէ համագործակցություն` փաստելով որ ընտրությունները կեղծող իշխանություններից հնարավոր չէ ազատվել ընտրությունների միջոցով, ուստի անհրաժեշտ է մշակել դիմադրության նոր միջոցներ:
Մարդու իրավունքների և ժողովրդավարության ինստիտուտի տնօրեն Արփինե Գալֆայանը կարեւորեց արհմիությունների դերը աշխատավոր ժողովրդի և քաղաքացիական հասարակության շահերը ներկայացնելու և պաշտպանելու գործում:
«Էկոդար» հասարակական կազմակերպության նախագահ Հրայր Սավզյանը օրինակների օգնությամբ հիմնավորեց սեփականատերերի եւ կոռումպացված պաշտոնյաների ագահության պատճառով երկրի բնապահպանության ոլորտում առկա աղետալի վիճակը:
Հողագործության մասնագետ, դոցենտ Վարդան Հայկազյանը նկարագրեց պարենային անվտանգության ձեռքբերման համար անհրաժեշտ միջոցները և այն գործնականում ապահովելու համար գործողությունների ծրագիրը:
Մշակութաբան Լալա Մնեյանը ներկայացրեց «Լեզվի մասին» օրենքում ՀՀ Հառավարության կողմից առաջարկվող փոփոխությունների դեմ ընդվզող հասարակական կազմակերպությունների պայքարի գործընթացը և անելիքները:
Տեղեկատվական տեխնոլոգիաների մասնագետ Գարեգին Չուգասզյանը հիմնավորեց գիտական ու տեխնոլոգիական կտրուկ արդիականացման ու նորարարության կենսական անհրաժեշտությունը մեր երկրի համար` ներկայացնելով նաեւ մրցունակության կորստի հետևանքով առաջացող վտանգները:
Կառավարման մասնագետ, ազատամարտիկ Հարություն Մեսրոբյանը համոզմունք հայտնեց, որ քաղաքական և հասարակական փոփոխություններ կարող են ապահովվել միայն Հայաստանի թռիչքային տնտեսական զարգացման միջոցով, որը ներկա պայմաններում չունի այլընտրանք:
Հավաքն ամփոփեց «Սարդարապատ» շարժման նախաձեռմող խմբի անդամ Ժիրայր Սեֆիլյանը, որը հիմնավորեց «Սարդարապատ» շարժման կազմակերպչական ամրապնդման անհրաժեշտությունը, կարևորելով ազգային հանգանակությունը որպես ժողովրդի առավել ակտիվ մասի կազմակերպման և դիմադրական շարժման մեջ մասնակցության ձև:
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
Մեկնաբանել