Իսկ Ա. Մարգարյանի անվան դպրոցի երեխաները` քիմիայի և ֆիզիկայի նոր լսարաններ Սեպտեմբերի 23-ին   «Փյունիկ» հիմնադրամի բարեգործությամբ Լոռու մարզի Ախթալա քաղաքի Անդրանիկ Մարգարյանի անվան միջնակարգ դպրոցում բացվեցին  քիմիայի և ֆիզիկայի  նոր լսարաններ` ժամանակակից  լաբորատորիաներով: Ախթալա քաղաքի կենտրոնական մասում բացվեց երեխաների նորակառույց խաղահրապարակը, որի  կառուցման համար 3,8 մլն դրամի ներդում կատարել է  Ախթալայի քաղաքապետարանը: Լսարանների և խաղահրապարակի բացման արարողությանը մասնակցեցին   հիմնադրամի համանախագահներ  Գաբրիել  Ջամբարջյանը  և ՀՀ նախագահ Սերժ Սարգսյանի եղբայր` Լևոն Սարգսյանը: Նրանց ուղեկցում էին ԱԺ պատգամավորներ, ՀՀ կառավարության անդամներ և հոգևորականներ: Ախթալեցիները հյուրերին   ընդունեցին ուրախ  երաժշտությամբ ու աղուհացով:  Հիմնադրամի համանախագահները դիտեցին  իրենց բարեգործությամբ դպրոցի ֆիզիկայի և քիմիայի նոր սարքավորումներով և լաբորատոր նյութերով հագեցված լսարանները: Ախթալայի դպրոցի  տնօրեն Լեռիկ Ճիճիլյանը  հայտարարեց, որ այսուհետ դպրոցի ֆիզիկայի լսարանը կկոչվի  բարերար, «Փյունիկ» հիմնադրամի համանախագահ Գաբրիել Ջամբարջյանի եղբոր`Սարգիս Ջամբարջյանի անվամբ: Համանախագահները նաև այցելեցին խաղահրապարակ, որտեղ նրանց սպասում էր Ախթալայի գրեթե ողջ բնակչությունը: Ախթալայի քաղաքապետարանի միջոցներով խաղահրապարակում տեղադրվել էր խաչքար, որն օրհնեց Սիրիայից ժամանած  Արքեպիսկոպոս Սուրեն Սրբազանը: Համանախագահներին ողջունեց Ախթալայի քաղաքապետ Հայկ Խաչիկյանը: Սոցիալական ապահովագրության պետական հիմնադրամի նախագահ, ախթալեցի Վազգեն Խաչիկյանը, ով Ախթալայի զարգացման լայնամասշտաբ միջոցառումների հեղինակն ու կազմակերպիչn է, իր ելույթում ասաց. «Այս վայրը ընդամենը 4 ամիս առաջ բանջարանոց էր, այս հողամասից օգտվում էին ընդամենը մի 15-20 ընտանիք: Երբ խնդիր էր դրված խաղահրապարակ սարքել, 2-3 հոգի գտնվեցին, որ ասացին, թե իրենց տարիներով ցանածը մենք ուզում ենք ոչնչացնել: Բայց հիմա տեսնում ենք, որ արդեն այս տարածքից օգտվում են ոչ 15-20, այլ ավելի շատ բնակիչներ»: