«Առողջ ազգ, առողջ տնտեսություն» քարոզարշավի շրջանակներում Գյումրիում «Ճանաչենք հայրենական դեղարտադրությունը» միջոցառում շնորհանդեսին մասնակցում էին տեղի ոլորտի մոտ 100 ներկայացուցիչներ: «Սովորեք, ճանաչեք, գնեք մերը». սա կարելի էր համարել միջոցառման կարգախոսը: «Լիկվոր», «Արփիմեդ», «Էսկուլապ», «Երեւանի քիմիական դեղագործական ֆիրմա» եւ «Մեդիքալ Հորիզոն» ընկերությունների ներկայացուցիչները ներկայացրեցին իրենց արտադրանքը, հայկական դեղարտադրության ներկա վիճակն ու զարգացման հեռանկարները: Հայ դեղագործները չմոռացան նշել, որ հայկական արտադրանքը, շատ հաճախ չզիջելով որակով արտասահմանյան նույնատիպ դեղամիջոցներին, ունի մեկ այլ առավելություն եւս, էժան է, մատչելի բոլորի համար: Այդ դեպքում, ի՞նչն է պատճառը, որ հայ գնորդը շարունակում է պահանջել արտասահմանյան, թանկ, սակայն արդեն իրեն հայտնի ու տարիներով փորձած դեղամիջոցը: Պարզվում է` նույն բուժաշխատողը, ով նշանակումներ է անում, տեղյակ չէ, թե հայկական որ դեղամիջոցն ինչ հիվանդության համար է նախատեսված: Մեկ այլ դեպքում պարզվել է, որ այս ոլորտի շատ մասնագետներ ընդհանրապես չգիտեն, թե արտասահմանյան տվյալ հաբերի հայկական համարժեքը գոյություն ունի, թե չէ: Եվ կա հայկականը չգնելու եւս մեկ խնդիր` հայ գնորդը չի վստահում հայրենական արտադրանքին: ԱՄՆ ՄԶԳ ֆինանսավորմամբ իրականացվող «Մրցունակ մասնավոր հատված Հայաստանում» (CAPS) ծրագրի աջակցմամբ, Հայաստանի դեղարտադրողների եւ ներմուծողների միությունը, «Ջի Էքս Պի» Գերազանցության կենտրոնի հետ համատեղ մարզերում կազմակերպվող ճանաչողական նմանատիպ արշավների միջոցով փորձում է հասանելի դարձնել հայրենական արտադրանքը նախ եւ առաջ հայ բժիշկներին եւ դեղագետներին: 2010թ-ի դրությամբ Հայաստանում գրանցված է հայրենական արտադրության 300 անուն դեղ: Հայրենական դեղարտադրության արտահանման շուկաներ են գործում Վրաստանում, Ուզբեկստանում, Ռուսաստանում, Բելառուսում, Մոլդովայում, Թուրքմենստանում, Ուկրաինայում, Տաջիկստանում եւ Ղրղզստանում: