Շուշան Հարությունյան Հարավային Կովկասում առաջին TEDx ֆորմատի միջոցառումը շաբաթ օրը` առավոտից մինչ երեկոյան ժամը 6-ը, լարված պահեց Երևանի «Անի պլազա» հյուրանոցի դահլիճում հավաքված 200 հրավիրյալին: Փակ միջոցառմանը գաղտնաբառով մուտք գործած անգլախոս ներկաները մոտ 7 ժամ անընդմեջ հնարավորություն ունեցան լսելու շնորհանդեսներ ու ելույթներ` նորարարությունների, սոցիալական մեդիայի ու տեխնոլոգիաների, երիտասարդության, կրթության, հայրենիքի, աշխարհագրական բաժանումների, ընդհուպ մինչև մարդու արժեքի և երջանկության նորագույն մոդելների մասին: Խոսնակները Հայաստանից, ԱՄՆ-ից, Կանադայից, Բրիտանիայից, Քուվեյթից, Վրաստանից թվով 17 հրավիրյալ փորձագետներ էին, ինչպես նաև մրցույթով ընտրված մասնագետներ: Reddit.com համակարգի հիմնադիր, միջոցառման համանախաձեռնող Ալեքսիս Օհանյանը խոսեց ԱՄՆ բարեգործական արշավների ու սոցիալական համակարգերի մասին: Լրագրող, վավերագիր Վարդան Հովհաննիսյանը իր նկարահանած ֆիլմից մի հատվածի միջոցով պատմեց Աֆրիկա մայրցամաքի մի կղզու երջանկության մոդելի մասին: Այդ կղզում 20 հազար մարդ է ապրում, 6 հազար էշ, և միայն 2 ավտոմեքենա կա: TEDx Երևանի ժամանակ երաժիշտ Սոնա Հովհաննիսյանը ներկայացրեց մենեջմենթի մասին իր պատկերացումները: Ազգությամբ նորվեգացի Թիմոթի Դ. Սթրայթը ներկայացրեց «Եվրասիա» հասկացության ու վերջինիս հասարակական համոզմունքների և աշխարհաքաղաքականության հարաբերակցությունը: Քուվեյթաբնակ Հակոբ Էմրազիանը իր շնորհանդեսը սկսեց նրանից, թե ինչպես է ճանապարհատրանսպորտային վթարի ենթարկվել, և իր անձնական օրինակով ցույց տվեց կրթական ծրագրերում ամեն ինչ «ընկալելի» ներկայացնելու կարևորությունը: Ամերիկաբնակ Միքայել Արամը խոսեց դիզայնը, պարզունակ արվեստը գնահատելու ու դրսի աչքով նայելու իր հնդկական փորձից: «Icon» ընկերության տնօրեն Ռաֆֆի Քասարջյանի թեման ուղեղների արտահոսքի կանխման հաջողակ մեթոդներն էին: Իսկ բրիտանացի Սայմոն Սքեմլ-Քեթսը բացատրում էր, թե ինչու են մարդիկ անընդունակ ռացիոնալ որոշումներ կայացնել, և ինչու է որոշումների կայացումը առհասարակ կապված զգացմունքների ու հույզերի հետ: Ելույթները ընդմիջվում էին տարբեր երկրներում անցկացված TEDx ձևաչափի միջոցառումների ամենահետաքրքրական վիդեոելույթներով: Այս ձևաչափի ելույթով միջոցառմանը մասնակցելու ցանկություն էր հայտնել նաև աշխարհահռչակ ռոք երաժիշտ Սերժ Թանգյանը: Հատկանշական է, որ ինչպես ցանկացած նոր տեխնոլոգիական միջոցառմանը, TEDx-ի ողջ ընթացքում նույնպես Twitter միկրոբլոգային համակարգի 140 սիմվոլի շրջանում հասանելի էին միջոցառմանը ներկաների «լուսաբանումն» ու մեկնաբանությունները դահիճում կատարվող ամեն մի փոփոխության մասին: Հենց այստեղ էլ ժամանակ առ ժամանակ դժգոհություններ էին հայտնվում այս կամ այն խոսնակի` շնորհանդեսի հատվածին ոչ հաջող պատրաստվածության կամ տվյալ պահին ներկայացվող թեմայի հետաքրքիր կամ անհետաքրքիր լինելու մասին: TEDx-ի նախաձեռնող Կրիստինե Սարգսյանը հայտնեց, որ հնարավոր է` այս դեկտեմբերին Երևանում նոր TEDx կազմակերպվի, միայն թե այդ ժամանակ այն կանանց ուղղվածություն կունենա: Իսկ TEDx-ի Երևանի ելույթները շուտով հասանելի կլինեն միջոցառման պաշտոնական կայքում, և հասարակական ավելի լայն շերտեր հնարավորություն կունենան ծանոթանալու դրանց: TEDx-ը անկախ կազմակերպվող միջոցառում է, որի հիմնական նպատակը մասսայականացման արժանի գաղափարների տարածումն է: Այն առաջին անգամ կազմակերպվել է 1984 թ. Կալիֆորնիայում, ապա տարեցտարի ավելի մասսայական դարձել: Ի տարբերություն իր իննովացիոն ձևաչափին` TEDx-ը հստակ ու խիստ կանոններ ունի, որոնցից հատկանշականը անցկացման փակ ֆորմատն է, մասնակիցների խիստ ցանկն ու միջոցառման ընթացքում որևէ տեսակի տեսանկարահանման անթույլատրելիությունը: TEDx-ն այսօր համացանցում համաշխարհային ամենատարբեր խոսնակների ավելի քան 700 հետաքրքրական վիդեոշնորհանդես ունի, որոնք, բացի առևտրային նպատակներով օգտագործելուց, հասանելի են առանց որևէ սահմանափակման: TEDx-ը նաև ոգեշնչող միջավայր է, ինչի հաստատումը Երևանում գտնվող կանադաբնակ լուսանկարիչ Հրայր Բազե Խաչերյանի ելույթն էր: Նա պատմեց, որ ըստ բժիշկների հաշվարկների` 10 օրից պիտի մահանար քաղցկեղից, բայց նույն ախտորոշմամբ արդեն 10 տարի, ինչ ճամփորդում է ամբողջ աշխարհով և լուսանկարում: