Այսօր ՀՀ վարչական դատարանում կայացավ «Խոսքի ազատության պաշտպանության կոմիտեն ընդդեմ ՀՀ առողջապահության նախարարության» գործով նախնական նիստը:

Հիշեցնենք, որ մարտի 25-ին ԽԱՊԿ-ն ՀՀ վարչական դատարան էր դիմել ՀՀ առողջապահության նախարարության գործողությունները (անգործությունը) ոչ իրավաչափ ճանաչելու և տեղեկատվություն տրամադրելու հայցապահանջով, քանի որ փետրվարի 11-ին նախարար Հարություն Քուշկյանին ուղարկված՝ հավատարմագրված լրագրողների և հավատարմագրման դիմումների մերժման վերաբերյալ տեղեկություններ տրամադրելու հարցմանը նախարարությունը պատասխանել էր ապրիլի 5-ին՝ խախտելով «Տեղեկատվության մասին» օրենքով սահմանված ժամկետը: Եվ միայն այն բանից հետո, երբ ստացել էր հայցադիմումը, նախարարությունը տրամադրել էր պահանջված տեղեկությունները: ԽԱՊԿ-ի հարցման հիմքում ՀՀ կառավարության 2010 թվականի մարտի 4-ի թիվ 333-Ն որոշումն է՝ ՀՀ պետական կառավարման մարմիններում լրագրողների հավատարմագրման օրինակելի կարգի մասին:

Այսօրվա նիստում հայցվորի ներկայացուցիչ Օլգա Սաֆարյանը դատարանին տեղեկացրեց, որ քանի որ պատասխանող կողմն արդեն ուղարկել է պահանջվող տեղեկատվությունը, հայցվորը հրաժարվում է տեղեկատվությունը տրամադրելու հայցապահանջի մասից և խնդրում է դատարանին կարճել այն: Սակայն հայցվորը պնդում է առողջապահության նախարարության անգործությունը ոչ իրավաչափ ճանաչելու հայցապահանջի մասը:

Դատարանը գտավ, որ ապացուցման բեռը պետք է դրվի պատասխանողի վրա, քանի որ, համաձայն Վարչական դատավարության օրենսգրքի, պետական մարմինը, որը չի կատարել որևէ հայցվող գործողություն, սակայն, հայցվորի պնդմամբ, պարտավոր էր այն կարարել, կրում է իր անգործության համար հիմք ծառայած փաստական հանգամանքների ապացուցման բեռը, այն է՝ հիմնավորելու փետրվարի 11-ի օրենքով սահմանված ժամկետում պատասխան ներկայացված լինելու փաստը, եթե այդպիսի փաստ առկա է, իսկ այդպիսի փաստ առկա չլինելու դեպքում՝ այդպիսի փաստ չներկայացնելու իրավաչափությունը:

Դատավոր Ռ.Հակոբյանը հայտարարեց դատաքննության փուլ անցնելու մասին և դատաքննության օր նշանակեց նոյեմբերի 15-ը: