Թերթի ձեռքի տակ են հայտնվել փաստաթղթեր, որոնք, ըստ էության, հաղորդում են քրեական հանցագործության մասին: Այդ ծառայողական փաստաթղթերը վկայում են, թե ինչպես ՀՀ պատկան մարմինները կարող են մի որոշում կայացնել, իսկ օրեր անց ուղիղ հակառակ ուոշումն իրագործել: Երկուշաբթի Լոս անջելեսում Հայաստանի հյուպատոսության նախկին աշխատակից Հակոբ Հովհաննիսյանը, որը նույն քաղաքում ՀՀ նախկին հյուպատոս Նորայր Ղալումյանի և ևս 3 հայ դիվանագետների հետ ԱՄՆ իրավապահ մարմինների կողմից մեղադրվում է հայ ներգաղթյալներին կեղծ փաստաթղթեր վաճառելու համար, ԱՄՆ դատարանում ընդունել է իր մեղքը: ԱՄՆ պատկան մարմինները, ինչպես ժամանակին գրեց ամերիկյան մամուլը, հայտարարեցին, թե այդ անձինք հայ ներգաղթյալներին «կեղծ փաստաթղթեր տրամադրելիս կապ են ունեցել Հայաստանի կառավարության պաշտոնյաների հետ»: Նույն մամուլը, հղում անելով ԱՄՆ իրավապահ մարմիններին, նշում էր նաև, որ այդ կեղծ փաստաթղթերը վաճառվել են յուրաքանչյուրը 25-30 հազար դոլարով: Թերթի ձեռքին հայտնված ծառայողական փաստաթղթերից ակնհայտ է դառնում, որ ՀՀ արտաքին գործերի նախարարությունում գոնե որոշ դեպքերում խիստ լավատեղյակ են եղել նման գործարքների մասին: Ավելին, որոշ փաստաթղթերի տակ կա ՀՀ ԱԳ նախարար Էդվարդ Նալբանդյանի ներկայիս խորհրդական Դավիթ Սարգսյանի ստորագրությունը, նույնիսկ ձեռագիր հրահանգը, թե ինչպես վարվել տվյալ ներգաղթյալի հետ: