Փորձագետ Մեսրոպ Հարությունյանը հեռարձակման թվայնացման գործընթացի օրենսդրական կարգավորման աշխատանքներն ավարտին հասցնելու նպատակով ստեղծվող աշխատանքային խմբի մասին ասել էր. «Օրենք գրող աշխատանքային խումբը պետք է կազմված լինի 2-3 մարդուց: 20 հոգով օրենք չեն գրում: Եթե 20 հոգով սկսեցին օրենք գրել, ինչպես ասում են` գրեցին սառույցին»: Այդ աշխատանքային խմբի ղեկավար, ՀՀ մարդու իրավունքների պաշտպան Արմեն Հարությունյանն այս կապակցությամբ «Առավոտին» ասաց. «Չգիտեմ` որտեղից է վերցրել այդ թիվը: Այդ խմբում 20 հոգի չի լինելու: Ու պետք չէ իրավաբանական տեխնիկայի մասնագետ լինես, որ հասկանաս, որ 2-3 հոգով օրենք գրելն էլ է աբսուրդ: Եվ մեր երկրի հիմնական խնդիրներից մեկն է, որ որոշ օրենքներ 2 հոգով են գրում: Այս մեկը լինելու է 8-9 հոգանոց փորձագիտական խումբ»: