Նրան ճանապարհեցին ծափերով Մինչ այսօր փորձեր էին արվում վերականգնել ԱԺ քվեարկության համակարգը, արտահերթ ելույթով իր հրաժարականի դիմումը ԱԺ ամբիոնից ներկայացրեց ԱԺ արդեն նախկին փոխնախագահ Արևիկ Պետրոսյանը: Նա նշեց, որ 3 տարի զբաղեցրել է փոխնախագահի պաշտոնը և այդ ընթացքում շատ արդյունավետ ու համերաշխ է աշխատել պատգամավորների հետ: Ա.Պետրոսյանի ելույթն ավելի շատ հաշվետվության նմանվեց: «16 տարի է` զբաղվում եմ պետականաշինության գործով և ԱԺ ընտրություններին չեմ մասնակցել պաշտոն զբաղեցնելու համար»,- ասաց Ա. Պետրոսյանը: Մինչև պատգամավոր ընտրվելը նա եղել է Քաղծառայության խորհրդի փոխնախագահ, և այդ պաշտոնում իր պաշտոնավարման ժամկետր լրանալու էր 2013թ., սակայն Արևիկ Պետրոսյանը նշեց, որ ինքնակամ հրաժարվել է այդ պաշտոնից` պատգամավոր դառնալու համար: ԱԺ նախկին փոխխոսնակն ակնհայտ ցույց էր տալիս, որ հրաժարականի դիմումն իր սրտով չէ, և իրեն պարզապես պարտադրել են դա անել: Նրա խոսքում նաև վիրավորանք կար: Ելույթն ավարտելուց հետո Արևիկ Պետրոսյանը ցուցադրաբար լքեց նիստերի դահլիճը, ինչն ուղեկցվեց պատգամավորների ծափահարություններով: Արդեն դրսում լրագրողների հետ զրույցի ժամանակ Արևիկ Պետրոսյանն ասաց, որ շարունակելու է մնալ «Բարգավաճ Հայաստան» կուսակցության անդամ: Իսկ այն հարցին, թե ինչու ԲՀԿ-ն իրեն հեռացրեց զբաղեցրած պաշտոնից, Ա.Պետրոսյանն ասաց, որ մամուլն այդ մասին արդեն գրել է, և ավելորդ մեկնաբանություններ տալու ցանկություն չունի. «Դա եղել է կուսակցության որոշումը, ես էլ ընդունել եմ»: Ինչ վերաբերում է շրջանառվող լուրերին, թե առաջիկայում նշանակվելու է Սահմանադրական դատարանի անդամ, Արևիկ Պետրոսյանն ասաց, որ այդ լուրն իր համար անակնկալ է եղել, բայց դրական է վերաբերվում, քանի որ իրեն հարգող յուրաքանչյուր իրավաբանի համար պատիվ է նման պաշտոն զբաղեցնելը: Լրագրողը հարցրեց, թե նախկին փոխխոսնակն արդյոք նեղացած չէ՞ իր կուսակցությունից. «Նեղանալն արդյոք քաղաքակա՞ն կատեգորիա է: Ոչ»,- հնչեց պատասխանը: Ա.Պետրոսյանն ասաց, որ այսօր ԱԺ աշխատանքին չի մասնակցի, իսկ հաջորդ նիստերին կաշխատի բնականոն ձևով: «Իսկ մասնակցելո՞ւ եք ԱԺ նոր փոխնախագահի ընտրությանը» հարցին էլ հետևյալ կերպ արձագանքեց. «Ակնկալում եք անկեղծ պատասխան, չէ՞...»: Եվ առանց կոնկրետ պատասխան տալու` հեռացավ: