Վանաձորում բավականին մեծ ու լուծում պահանջող խնդիրներից մեկը երթևեկության համար նախատեսված ճանապարհների անվտանգությունն ու անբարեկարգ վիճակն է: Քաղաքի կենտրոնական հատվածներում փողոցները բարեկարգ են, իսկ ծայրամասերում կամ կենտրոնից քիչ հեռու վիճակն այդքան էլ լավ չէ: Ճանապարհային քանդված հատվածներ կան ամենուր: Բազում թաղամասը Խնձորուտին միացնող հատվածում երթևեկում են 6 համարի ավտոբուսն ու միկրոավտոբուսը: «Էս ինչ ճամփաներ են, իհարկե դժգոհ եմ, մեքենաս ամբողջությամբ փչանում է»,- բողոքում է վարորդներից մեկը: Գրեթե նույնն է ասում Իսահակյանից դեպի Ներսիսյան փողոց երթևեկող միկրոավտոբուսի վարորդը. «Անընդհատ ավտոյիս մեխանիզմը վնասվում է, ստիպված փոխում եմ»: Ուղևորներն էլ բողոքում են, որ բացի անհարմարավետությունից մի մեծ խնդիր ևս կա: «Վտանգավոր է այս հատվածներում երթևեկելը: Անձամբ ես անհանգստանում եմ իմ կյանքի համար»,- նշում է Գագիկ Վարդանյանը: Այս ամենը` այն դեպքում, երբ «Ճանապարհային երթևեկության ապահովման մասին» ՀՀ օրենքի համաձայն` պաշտոնատար անձինք պարտավոր են «ճանապարհը և դրա ինժեներական կառույցները երթևեկության համար պահպանել անվտանգ վիճակում` ապահովելով ճանապարհային երթևեկության անվտանգության մասին օրենսդրության ստանդարտների, նորմերի և կանոննների պահանջները»: Բողոքների և օրենքի կիրառման մասին տեղեկություն-պարզաբանում ստանալու համար դիմեցինք Վանաձորի քաղաքապետարանի ճարտարապետության և քաղաքաշինության բաժին: «Այսօր քաղաքապետարանի կողմից կազմված է ծրագիր` այս և հաջորդ տարի  փողոցների վերանորոգման աշխատանքների վերաբերյալ: Առաջին հերթին ուշադրություն է դարձվելու տրանսպորտային երթուղիների ճանապարհների կարգավորմանը: Այս տարվա համայնքային բյուջեից հատկացված է որոշակի ֆինանս, մի մասն էլ կհատկացվի մյուս տարի»,- հայտնեց բաժնի պետի տեղակալ Արշավիր Ղուկասյանը: Իսկ կոմունալ տնտեսության և բարեկարգման բաժնի պետ Լյովա Մելիքյանից տեղեկացանք, որ նախագծի համաձայն` տրամադրվող գումարը 30 մլն դրամ է: Ավագանու նիստի ժամանակ այդ գումարի չափը հաստատվեց: Կապիտալ նորոգման ենթակա փողոցներն ու մայթերն առայժմ 43-ն են: Նշենք նաև, որ նախորդ տարի մոտ 72 մլն դրամ է ծախսվել 33 փողոցների և մայթերի կապիտալ վերանորոգման համար: Սերինե Գաբրիելյան Վանաձորի պետական մանկավարժական ինստիտուտի լրագրության բաժին