Լոռու մարզի Կուրթան գյուղի բնակիչ Ռոստոմ Հարությունյանն օգոստոս ամսի կեսերին նկատել է, որ նոր վերանորոգված ճանապարհից իրենց տան պատշգամբի տակ է լցվում անհայտ ակունքներից դեպի տուն հոսող ջուրը: Գյուղացին փորձել է սեփական միջոցներով լուծել խնդիրը, բայց ապարդյուն. ջուրը այսօր էլ շարունակում է թափվել տան տակ: Ռոստոմն այս մասին հայտնել է համայնքի ղեկավար Մհեր Գևորգյանին: «Ես գյուղապետին ասել եմ, որ ջուրը ճամփից լցվում ա տան տակ: Գյուղապետն ասում ա` դու ձեռով փորի, ասֆալտը քանդի, մինչև կհասնես վթարի տեղին: Ես հնարավորություն չունեմ, ինչո՞վ փորեմ, ո՞նց փորեմ, գյուղացի ենք, բայց հո էշ չենք,-վրդովված նշում է Ռոստոմը,- էսօր իմ տունն ա լցվում, վաղն էլ հարևաններինն ա լցվելու»: Մհեր Գևորգյանը մեզ հետ զրույցում նշեց, որ նման դեպքերում իրենք ահազանգում են «Լոռի-ջրմուղկոյուղի» ՓԲԸ, և որոշ ժամանակ անց խնդիրը կարգավորվում է. «Ես այս խնդրի մասին ահազանգել եմ արդեն, սակայն ինձ թվում է, որ աշխատանքներ կտարվեն սեպտեմբերի 18-ից հետո միայն` Նովոսելցովոյի ջրագծի հետ կապված աշխատանքներից հետո»: Գևորգյանը նշեց նաև, որ անհրաժեշտության դեպքում ինքը տրամադրում է տրակտոր, մնացած կազմն ուղարկում է «Լոռի-ջրմուղկոյուղին»: «Լոռի-ջրմուղկոյուղի» ՓԲԸ-ի տեխնիկական տնօրեն Գագիկ Ալոյանն  էլ պարզաբանեց. «Լինում է ահազանգ համայնքի կողմից, մենք էլ ուղարկում ենք աշխատանքային կոլեկտիվ և փորձում ենք շտկել խնդիրը: Բայց հիմա ամենակարևորն այն է, որ մենք ժամանակ չունենք դրանով զբաղվելու, քանի դեռ քաղաքի կեսը ջուր չունի»: «Լոռի-ջրմուղկոյուղու» հերթապահ ծառայությունից  էլ ճշտեցինք, որ մոտակա 20 օրերի ընթացքում ոչ մի ահազանգ չի գրանցվել Կուրթան համայնքից: Ամեն դեպքում, մի բան պարզ է. մինչև աշխատանքները կսկսվեն, երևի գյուղացու պատշգամբի մի մասը կմնա անհայտ ակունքներից թափվող խմելու ջրի տակ: Ինչպես հայկական ասացվածքն է ասում` «Մինչև առուն ջուր գա, գորտի աչքը դուրս կգա»: Անի Խաչատուրյան Վանաձորի պետական մանկավարժական ինստիտուտի լրագրության բաժին