Երեք հարց նախագահին, վարչապետին, կրթության նախարարին
«Նորավանք» գիտակրթական հիմնադրամի փորձագետ, պատմական գիտությունների թեկնածու Թամարա Վարդանյանն հստակ հասցեատերերի ուղղված երեք հարց ունի եւ ակնկալում է պատասխաններ:
Առաջին հարցը ուղղված է վարչապետ Տիգրան Սարգսյանին, ով 2008 թ. դեկտեմբերին Վրաստան այցելության ժամանակ` Նորաշեն եկեղեցու բացումից հետո, հայտարարեց, թե անհրաժեշտ է, որ Հայաստանում ստեղծվի աշխատանքային խումբ, որը հաջորդ տարվա փետրվարի առաջին տասնօրյակում կներկայացնի հայեցակարգ հայ համայնքի հարցով. «Ինչպիսի՞ ընթացք ունեցավ խոստումը: Լավ կլիներ`վարչապետը ներկայացներ այդ հայեցակարգի ներկայացման հետագա ճակատագիրը»:
Երկրորդ հարցն ուղղված է ԿԳ նախարար Արմեն Աշոտյանին. «Ինչպե՞ս է նա հիմնավորում է իր այն հայտարարությունը, թե Ջավախքում հայ-վրացական համալսարան բացելու կարիք չկա: Ի՞նչ նկատի ուներ նախարարը, երբ հայտարարեց, որ Ջավախքի պահպանման գրավականը վրացերենի իմացությունն է»: Թամարա Վարդանյանի համար անհասկանալի է, թե ինչպես է իրականցվում հայապահպանությունը վրացերենով:
Երրորդ հարցը ուղղված է նախագահ Սերժ Սարգսյանին. «Ի՞նչ նկատի ուներ նախագահը, երբ այս տարվա սկզբին մարտի մեկին Սահակաշվիլու հետ ունեցած հանդիպման ժամանակ հայտարարեց, որ այս տարին բեկումնային է լինելու հայ-վրացական հարաբերությունների համար: Դա նշանակում է կարեւոր հարցերում առաջընթացի արձանագրու՞մ: Բայց մենք առայժմ դա չենք տեսնում, մինչեւ տարվա վերջ երեք ամիս կա, գուցե բեկումը տեսնենք»:
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
Մեկնաբանել