ՀՀ գլխավոր դատախազ Աղվան Հովսեփյանի նախաձեռնությամբ այսօր ՀՀ գլխավոր դատախազությունում, տեղի ունեցավ ընդլայնված խորհրդակցություն` ապօրինի անտառահատումների դեմ պայքարի, անտառապահպանական և անտառօգտագործման խնդիրների վերաբերյալ: Հանդիպմանը մասնակցում էին ՀՀ բնապահպանության նախարար Ա.Հարությունյանը, ՀՀ գյուղատնտեսության նախարար Գ.Ալավերդյանը, ՀՀ գլխավոր դատախազի տեղակալ Ա.Թամազյանը, Տավուշի մարզպետ Ա.Ղուլարյանը, Կոտայքի և Լոռու փոխմարզպետեր Վ.Բակլաչյանը և Ա.Դարբինյանը, «Հայանտառ» ՊՈԱԿ-ի տնօրեն Մ.Մաթևոսյանը, վերոհիշյալ նախարարությունների վարչությունների պետեր, ՀՀ դատախազության Լոռու, Տավուշի, Կոտայքի մարզերի դատախազներ, ՀՀ ոստիկանության մարզային վարչությունների պետեր, պաշտոնատար այլ անձինք: Ա.Հովսեփյանը խորհրդակցության մասնակիցներին ներկայացրեց խնդրի հրատապությունը և կարևորությունը` մասնավորապես շեշտելով. «Ապօրինի անտառահատումների դեմ պայքարը չպետք է կրի ժամանակավոր, դիպվածային բնույթ` պայմանավորված հասարակության արձագանքներով, այլ պետք է մշտապես, հետևողական և շարունակական միջոցառումներ իրականացնել»: Գլխավոր դատախազը հանդիպման մասնակիցներին առաջարկեց ներկայացնել տեսակետներ, կարծիքներ, առաջարկություններ` ապօրինի անտառահատումների դեմ պայքարի աշխատանքները առավել արդյունավետ կազմակերպելու վերաբերյալ: ՀՀ գլխավոր դատախազի տեղակալ Ա.Թամազյանը ներկաներին տեղեկացրեց ՀՀ դատախազության օրենսդրական նախաձեռնության մասին, որով նախատեսվում է հիշյալ ոլորտում խստացնել պատժողական քաղաքականությունը, օրենսդրական հիմքեր նախատեսել` օրինախախտներին քրեաիրավական պատասխանատվության ենթարկելու համար: Հանդիպման մասնակիցները առաջարկություններ ներկայացրին նաև ապօրինի անտառահատումների դեպքերի վիճակագրությունների համակարգված մեխանիզմներ ստեղծելու, հաշվառելու ուղղությամբ: ՀՀ դատախազության մարզային կառույցները ղեկավարող դատախազները ներկայացրեցին տեղերում տիրող իրավիճակը: Մասնավորապես, ՀՀ Լոռու մարզի դատախազ Կ.Շահբազյանը զեկուցեց, որ մարզի իրավապահ մարմինների նախապատրաստած նյութերն անհամեմատ ավելի շատ են, քան իրավասու այլ տեսչությունների կողմից իրավապահներին ներկայացված հաղորդումները: Ա.Հովսեփյանը ցուցում տվեց, որ ապօրինի անտառահատումների վերաբերյալ բոլոր դեպքերով ՀՀ բնապահպանության և գյուղատնտեսության նախարարությունների համապատասխան վարչություններ հայտնաբերած իրավախախտումների դեպքերի վերաբերյալ նյութերը ուղարկվեն տարածքային` մարզային դատախազներին` դրանցով հետագա ստուգումներ կատարելու, որոշումներ կայացնելու համար: Գլխավոր դատախազն առաջարկեց մարզերում, անտառամերձ գոտիներում ստեղծել պահակակետեր, որոնք պետք է հսկողություն իրականացնեն ճանապարհների վրա` բացառելու համար ապօրինի հատված ծառերի տեղափոխումը: «Եվ ամենակարևորը, այդ պահակակետերում հսկողական աշխատանքները պետք է անպայման կազմակերպվեն շահագրգիռ ՀԿ-ների հետ համատեղ: Բնապահպանական հիմնախնդիրներով զբաղվող կամ այլ հասարակական գործունեություն իրականացնող ՀԿ-ների ներկայացուցիչները անպայման պետք է ներգրավված լինեն այդ պահակակետերում և պետական ծառայողների հետ համատեղ իրականացնեն հասարակական հսկողություն` անհրաժեշտ տեղեկատվություն ապահովելով զանգվածային լրատվամիջոցներին»,- ասաց ՀՀ գլխավոր դատախազը: Նրա կարծիքով` ՀԿ-ների ներկայացուցիչների ներգրավվածության կարևորությունը պայմանավորված է նախևառաջ հասարակությանը հուզող այս խնդրում առավել թափանցիկություն ապահովելու, հասարակական վերահսկողության միջոցով ապօրինի անտառահատումների դեմ պայքարն առավել արդյունավետ դարձնելու նպատակահարմարությամբ: Բնապահպանության նախարար Ա.Հարությունյանը նույնպես շեշտեց բնապահպանական ոլորտի աշխատանքների թափանցիկության ապահովումը` նշելով ծավալուն քարոզչական աշխատանքներ տանելու անհրաժեշտության մասին, որ հասարակությունը իրազեկվի, թե ինչ է նշանակում սանիտարական հատում, ինչ աշխատանքներ են կատարվում և այլն: Ա.Հարությունյանը նշեց նաև, որ անհրաժեշտ է, որ վերստուգում, մոնիտորինգ իրականացնող մարմինների, ինչպես նաև դատախազությունը, հետաքննություն ու նախաքննություն իրականացնող մարմինները սերտ համագործակցեն իրար հետ: «Հայաստանը` Մեծ Հայքը պատմագրության մեջ հաճախ հիշատակվել է որպես անտառախիտ տարածքներով տերություն: Մենք պարտավոր ենք պահել ու պահպանել բնության կողմից մեզ տրված այդ բարիքը»,- նշեց Ա.Հովսեփյանը` ամփոփելով քննարկումը: Հանդիպման ավարտին որոշվեց հաջորդ քննարկումը կազմակերպել տեղերում` իրականացված միջոցառումների արդյունքները ամփոփելու ժամանակ: Այս մասին հայտնում է ՀՀ գլխավոր դատախազությունը: