Երեկ առավոտյան հեռուստատեսային ջրիկ թողարկումների թիվ մեկ լուրը այն հորինվածքն էր, թե թուրքական կուսակցություններից մեկի ղեկավարը, իր շքախմբով հանդերձ, խախտել է սահմանը. Ախուրյան գետն անցնելով` մտել Հայաստան: Ընդ որում` թուրքական քաղաքական գործիչները իբր այսպիսով իրենց բողոքն են արտահայտել հայ-թուրքական սահմանը փակ լինելու կապակցությամբ: «Այդ խոսակցությունները հեքիաթներ են, ինչ-որ մեկի հիվանդ երեւակայության ծնունդ: Ախուրյանի մոտ ոչ մի նման փորձ չի եղել: Վերջին շրջանում ընդհանրապես սահմանի այդ տեղամաս մյուս կողմից ոչ մեկը չի էլ անցել»,- հերքելով սահմանախախտման մասին հիշյալ լուրերը` երեկ «ՀԱ»-ի թղթակցի հետ զրույցում ընդգծեց Ռուսաստանի ԱԴԾ-ի սահմանապահ ուժերի Հայաստանի վարչության պետի տեղակալ, գնդապետ Անդրեյ Գուզեեւը: Մեր զրուցակիցը նշեց, որ անցած շաբաթ Մարգարայի մոտ` թուրքական կողմում, նկատվել է ինչ-որ խումբ, որի անդամները դրոշներ են թափահարել, ապա արագորեն հեռացել: Իսկ Ախուրյանի մոտ նման բան ընդհանրապես չի եղել, Թուրքիայի կողմից ոչ մեկը Հայաստանի սահմանը չի խախտել, առավել եւս ինչ-որ քաղաքական գործիչներ: «Այսպես ասեմ. եթե նման բան լիներ, ապա մենք նրանց ավելի մոտիկից կծանոթանայինք, քան այսպես` ԶԼՄ-ի հրապարակումների միջոցով»,- ասաց գնդապետ Անդրեյ Գուզեեւը: