Չվճարված աշխատավարձերի եւ տարիներով կուտակած սոցվճարների խնդիրը Շիրակի մարզխորհրդի օրակարգի հաջորդ հարցն էր: Մարզպետարանի ֆինանսատնտեսական վարչության պետը նշեց, որ շատ դեպքերում այդ պարտքը գյուղապետերը ժառանգություն են ստացել իրենց նախորդներից եւ հիմա ոչ միայն դժվարանում են մարել դրանք, այլեւ ընթացիկ պարտքեր են գոյացնում:  2010 թ.-ի հունվարի 15-ի դրությամբ մարզի 34 համայնք ունեցել է նախորդ տարիներից կուտակած պարտքեր` 130 մլն 280 հազար դրամ, որից աշխատավարձ` 73 մլն 164 հազար դրամ, պարտադիր սոցիալական ապահովության վճար` 57 մլն 116 հազար դրամ: Այս ընթացքում ընդամենը մարվել է 48 մլն դրամը: 9 ամիսների ընթացքում պարտքեր ունեցող 34 համայնքներից 8-ն ամբողջությամբ ձերբազատվել են պարտքերից: Հոկտեմբերի 1-ի դրությամբ մարզի 27 համայնք դեռեւս ունի 82 մլն 217 հազար դրամի աշխատավարձերի եւ սոցվճարների պարտքեր: Մարզի Լեռնագյուղ, Ղազանչի, Սիզավետ համայնքներն առաջացրել են ընթացիկ պարտքեր, որը դոտացիան հատկացնելիս կառավարությունում անպայման հաշվի են առնելու: Իսկ դա նշանակում է պետության կողմից հատկացվող գումարների նվազեցում: Նիստը վարող փոխմարզպետ Սեյրան Պետրոսյանին հետաքրքեց Բենիամին համայնքի ղեկավարի աշխատելաոճը: 2 մլն 360 հազար դրամ աշխատավարձի պարտք ունի համայնքապետարանը, հարկերի գանձումն էլ 30 տոկոսով է ապահովել: «Դուք ոնց եք պատկերացնում ձեր հետագա աշխատանքը»,-Բենիամինի գյուղապետ Սամվել Մկրտչյանին դիմեց նիստը նախագահող Սեյրան Պետրոսյանը: « Դա նախկինում գոյացած պարտք է, պարոն փոխմարզպետ, որը չի վճարվել 2000-2008թթ-ին,-պատասխանեց համայնքապետը,-իրականում ես ասեմ, թե ինչու չեմ տալիս այդ աշխատավարձը: Մեր գյուղում գործել է գյուղապետրանի հետ կոլեկտիվ տնտեսություն, որը մինչեւ օրս 6 մլն դրամ պարտք է մեզ եւ չի ուզում վճարել: Երբ վճարեն, ես էլ աշխատավարձերը կտամ»: «Այսինքն զբաղվում եք ինքնիրավչությամբ, փոխանակ դատական կարգով այդ գումարը գանձեք»,-նկատեց փոխմարզպետը: «Այդ գումար դատական կարգով չեմ կարող գանձել, որովհետեւ վաղեմության կարգ կկիրառեն,-բացատրեց Բենիամինի համայնքապետը,-ինձ իրավաբանները բացատրել են, որ դատական կարգով ես այդ գումարը չեմ կարողանալու գանձել»: Ամեն դեպքում, Սամվել Մկրտչյանի բերած փաստարկները չհամոզեցին փոխմարզպետին: «Տեսեք-տեսեք ես գյուղապետ եմ…նորից եմ կրկնում, ինքնագործունեությամբ մի զբաղվեք, էս երկրում օրենքներ կան, փորձեք կիրառել»,-խորհուրդ տվեց Սեյրան Պետրոսյանը: Եւս մեկ խնդիր, որ նոր մարզպետի նշանակմանը զուգընթաց գլուխ է բարձրացրել համայնքներում ու բավական անհանգստանող երեւույթ դարձել մարզպետարանի համար. մարզպետարան տարբեր համայնքներից, կոլեկտիվներից վարկաբեկող բովանդակությամբ նամակներ են ստացվում: «Եղեք ուշադիր, աշխատեք այնպես, որ մենք այդ բովանդակ նամակներ չստանանք,-համայնքապետերին հորդորեց փոխմարզպետը,- այնպես աշխատեք, որ մարդիկ ձեր վրա, մեղմ ասած` «կլյաուզա» չգրեն: Չնայած ասեմ, որ, ինչ որ մարդկանց ցանկությունից ելնելով, տեղի-անտեղի մարդկանց աշխատանքից չենք ազատելու: Դուք աշխատեք աչալուրջ լինել, մենք էլ կփորձենք մեր հերթին արդարացի լինել»: