Այսօր ՀՀ վարչական դատարանի վճռով մերժվեց Խոսքի ազատության պաշտպանության կոմիտեի (ԽԱՊԿ) հայցն ընդդեմ Հեռուստատեսության և ռադիոյի ազգային հանձնաժողովի:

Հիշեցնենք, որ հայցպահանջն էր` պատասխանողի գործողությունները ոչ իրավաչափ ճանաչել և պարտավորեցնել տրամադրել 21.02.2011թ Ել. N-30 գրությամբ պահանջվող բոլոր փաստաթղթերը:

Վճիռը, ինչպես հարկն է, դատավորի կողմից չհրապարակվեց, այլ միայն տրամադրվեց կողմերին այն պատճառաբանությամբ, թե համակարգի հետ կապված խնդիրներ կան:

Հայցվորի ներկայացուցիչ Օլգա Սաֆարյանը հայտնեց, որ, փաստորեն, իրենց պնդումները այն մասին, թե արդյոք պատասխանողի փաստաթղթերը առևտրային գաղտնիք են պարունակում, դատարանին հետաքրքիր չէ: Դատարանը հավատում է պատասխանողին`պետական մարմնի ներկայացուցչին, և միայն նրա խոսքի հիման վրա է  վճիռ կայացնում:

Փաստաբանը շարունակեց` ասելով, որ համաձայն Վարչական դատավարության օրենսգրքի` դատարանը  գործի փաստերը պարզում է ի պաշտոնե, ինչը նշանակում է, որ, ի տարբերություն Քաղաքացիական դատարանի, որտեղ դատարանը գործի փաստերը պարզում է միայն կողմերի բերած ապացույցների հիման վրա, Վարչական դատարանը պետք է պարզի, թե պատասխանողի կողմից նշված առևտրային գաղտնիք պարունակող փաստաթղթերը արդյոք պարունակում են գաղտնիք, թե ոչ:

Սակայն տեղի է ունեցել հակառակը, այն է` պետական մարմնի այն հայտարարությունը, որ պահանջվող փաստաթղթերը պարունակում են առևտրային և անձնական գաղտնիք, բավական է եղել դատաարանին հայցը մերժելու համար` դրանով խախտելով խոսքի ազատության իրավունքը:

Հարցին, թե բողոքարկելու են դատարանի վճիռը, փաստաբան Սաֆարյանը դրական պատասխանեց. «Միանշանակ պետք է բողոքարկել»: