Տեսանյութեր
Լուսանկարներ
Վրացագիտության կենտրոնը բացվեց
Երևանի Վ. Բրյուսովի անվան լեզվաբանական համալսարանում տեղի է ունեցել վրացագիտության կենտրոնի և վրացերեն լեզվի լսարանի բացման հանդիսավոր արարողությունը: Ինչպես տեղեկացնում է ՀՀ ԿԳՆ-ն, կենտրոնի բացմանը մասնակցել են Հայաստանի և Վրաստանի կրթության և գիտության նախարարներ Ա. Աշոտյանը, Դ. Շաշկինին, փոխնախարար Ակակի Սեպերտելաձեն, Երևանի Վ. Բրյուսովի անվան պետական լեզվաբանական համալսարանի ռեկտոր Սուրեն Զոլյանը, Թբիլիսիի պետական համալսարանի ռեկտոր Ալեքսանդր Կվիտաշվիլին:
Բուհի ռեկտոր Ս. Զոլյանը ողջունելով հյուրերին, նշել է, որ լեզվաբանական համալսարանում վրացագիտության կենտրոնի և վրացերեն լեզվի լսարանի բացումը հնարավորություն կստեղծի ուսանողներին ծանոթանալու վրացական մշակույթին, լեզվին և պատմությանը:
Վրաստանի ԿԳ նախարար Դիմիտրի Շաշկինին նշել է, որ կենտրոնի բացումը մեր երկու երկրների միջև առկա բարեկամական հարաբերությունների դրսևորման կարևոր խորհրդանիշ է:
«Վրաստանի նման փոքր երկրի համար շատ կարևոր է այսպիսի կենտրոնի բացումը այսքան հարգված ուսումնական հաստատությունում”,-ասել է նախարարը` նշելով, որ այս գաղափարը ծագել էր դեռևս երկու նախարարների Վրաստանում կայացած հանդիպման ժամանակ:
«Ես շնորհակալություն եմ հայտնում ՀՀ ԿԳ նախարարին այս կարճ ժամանակահատվածում այս գաղափարը իրագործելու համար»,- հավելել է նա:
Հատուկ շեշտելով լեզվաբանական համալսարանում վրացերեն լեզվի կենտրոնի բացման կարևորություն` ՀՀ կրթության և գիտության նախարար Ա. Աշոտյանն ասել է, որ Բրյուսովի անվան լեզվաբանական համալսարանում դասավանդվում են 20-ից ավելի օտար լեզուներ և չկար հնարավորություն` սովորելու մեր բարեկամների և հարևանների լեզուն:
«Վրացերեն լեզվի ուսուցումը Հայաստանում կնպաստի երկու մշակույթների առավել մեծ ներթափանցմանը, փոխադարձ շփումներին, երկու հասարակությունների, հատկապես երիտասարդների միջև առավել ինտենսիվ մշակութային, հումանիտար կապերին: ՀՀ-ում սովորում են Վրաստանի քաղաքացի ազգությամբ հայ ուսանողներ և իրենց ուսումնառության ընթացքում նրանք կտրված են լինում վրացերենի ուսումնասիրման հնարավորությունից, այս կենտրոնում մենք կստեղծենք պայմաններ, որպեսզի նրանք կարողանան իրենց մասնագիտական կրթությանը զուգահեռ սովորել նաև վրացերեն և ուսումն ավարտելուց հետո ինտեգրվել վրացական հասարակությանը»,-նշել է նախարարը:
Երևանի Վ. Բրյուսովի անվան պետական լեզվաբանական համալսարանի ռեկտոր Սուրեն Զոլյանը Վրաստանի կրթության և գիտության նախարարին պարգևատրեց ԵՊԼՀ-ի 75-ամյակին նվիրված մեդալով:
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
Մեկնաբանել