Նվազման ցուցանիշներ` Արագածոտնի մարզում
Արագածոտնի մարզում 2009թ. համեմատ այս տարի գյուղատնտեսական համախառն արտադրանքի ծավալների 3,1 տոկոսի նվազում է արձանագրվել: 0.7 տոկոս անկում է արձանագրվել անասնաբուծության, 5.6 տոկոս` բուսաբուծության ոլորտում: Այս տարի զգալի վնասներ են կրել հատկապես խնձորի այգի ունեցողները: Ստացված բերքը մոտ 40 հազար տոննայով պակաս է նախորդ տարվա համեմատ:
Պատճառը հիմնականում բնակլիմայական անբարենպաստ պայմաններն են:
Մարզի համայնքների սեփական եկամուտների հավաքագրման ինն ամիսների ցուցանիշներով, արձանագրվել է նաև հողի հարկի հավաքագրման տեմպերի նվազում։ Նվազման միտումներ են գրանցվել նաեւ պետական եւ տեղական տուրքերի հավաքագրման մասով:
Արագածոտնի մարզպետ Սարգիս Սահակյանը «Հետքի» հետ զրույցում ասաց, որ նախորդ տարվա համեմատ հարկերի հավաքագրման այս տարվա ցածր ցուցանիշը պայմանավորված է 2009թ. գյուղացիներին տրված հողի հարկի վճարման արտոնություններով:
Նշենք, որ այդ արտոնություններով նախորդ տարիների հողի հարկի պարտք ունեցող գյուղացիները, փակելով պարտքերը, ազատվում էին կուտակված տուգանքներից:
Օգտվելով այդ արտոնությունից՝ 2009թ. գյուղացիները մեծ թափով փակել են հարկերը: Այդ պատճառով 2009թ. մարզի բյուջեն կատարվել էր ռեկորդային ցուցանիշով` 127 տոկոս: Մարզային իշխանությունները ստիպված են եղել տարվա վերջին փոփոխություն կատարել բյուջեում:
Թեեւ այժմ էլ հողի հարկի արտոնություններից գյուղացիները կարող են օգտվել, սակայն նույն խանդավառությամբ վճարումներ չեն կատարում, ինչպես նախորդ տարում: «Հիմա էլ վստահ եմ, որ տարեվերջին սեփական եկամուտները կկատարենք 100 տոկոսով»,-ավելացնում է մարզպետը:
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
Մեկնաբանել